Óskemen qalasyndaǵy jeke kásipker aqsha utyp alǵanyn aitqan alaiaqtarǵa 200 myń teńge aýdaryp jibergen, dep habarlaidy "Ult aqparat".
ShQO Politsiia departamenti baspasóz qyzmetiniń málimetine súiensek, kásipkerdiń «Vaiber» messendjerindegi akkaýntyna 4700 dollar utyp alǵany týraly habarlama kelgen. Alaida ol aqshany alý úshin 200 myń teńge aýdarý kerek ekendigi jazylypty.
Budan bólek, qaladaǵy emhananyń dárigeri de kiberalaiaqtardyń qurbanyna ainalǵan. Belgisiz bireýler onyń uialy telefonyna qońyraý shalyp, «qylmyskerler sizdiń banktik shotyńyzdaǵy aqshany sheship almaq bolǵan» dep aldaidy. Buǵan sengen áiel alaiaqtarǵa barlyq málimetterdi aita salady. Osylaisha jábirlenýshi 400 myń teńgege shyǵynǵa batqan.
«Atalǵan eki fakti boiynsha jedel izdestirý sharalary júrgizilýde», - delingen vedomstvo málimetinde.
