Óskemen qalasynda alaiaqqa aldanǵan áiel úiinen aiyryldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, politsiiaǵa júgingen 19 jastaǵy azamat ózin aldap soqqan kórshisiniń jataqhanadaǵy bólmesin ielenip alǵanyn jetkizdi. Osynyń saldarynan jábirlenýshige 3 500 000 teńge mólsherinde materialdyq zalal keltirilgen.
«Jedel-izdestirý sharalaryn júrgizgen politsiia qyzmetkerleri 27 jastaǵy kúdiktini ustady. Belgili bolǵandai, áiel adam zardap shegýshiniń psihonevrologiialyq esepte turatynyn bile tura, oǵan múlikti satýǵa senimhat jazdyryp alǵan. Keiin qolyndaǵy qujat arqyly kórshisiniń jyljymaityn múlkin satyp jiberdi», - delingen aqparatta.
Qazirgi ýaqytta ustalǵan áielge qatysty QR QK-niń 190-baby 3-bóligine (Alaiaqtyq) sáikes sotqa deiingi tergeý amaldary júrgizilip jatyr.
