Óskemen qalasynyń ákimi Jaqsylyq Omarǵa B.Aleksandrov atyndaǵy Sport saraiynda ótken sharada maska taqpaǵany úshin aiyppul salyndy, dep habarlaidy "Ult aqparat".
Buǵan deiin áleýmettik jelide Óskemende mánerlep syrǵanaýdan qalalyq mekteptiń festivali kezinde túsirilgen sýret taraǵan bolatyn. Sýretke kórermen retinde kelgen "Óskemen kólik kompaniiasy" JShS direktory Mihail Chaika, qoǵamdyq belsendi Elena Berezinskaia-Abilova men Jaqsylyq Omar túsirilgen. Jeli qoldanýshylary ákimdi is-sharaǵa maskasyz qatysqany úshin synǵa alǵan edi.
«B.Aleksandrov atyndaǵy Sport saraiynda ótken sharaǵa qatysqan shahar basshysy Jaqsylyq Omardyń maska taqpai túsken fotosýretine qatysty BAQ-ta taraǵan aqparattar jáne jeke tulǵalardyń ótinishteri muqiiat qaraldy. Sonyń nátijesi boiynsha atalǵan tulǵaǵa qatysty qysqartylǵan óndiristik tártippen QR ÁQBtK-niń 425-babynyń 1-bóligine sáikes ákimshilik aiyppul salyndy. Qazirgi ýaqytta J.Omar aiyppuldy óz erkimen tóledi», - dep habarlady departamenttiń baspasóz qyzmeti.
Osy rette, vedomstvo ókilderi ShQO Bas memlekettik sanitariialyq dárigeriniń qaýlysynda jazylǵan maska taǵý talaby barlyq jeke jáne zańdy tulǵalar úshin mindetti ekendigin eske saldy.
Sondai-aq, bul aqpardy ákimniń keńesshisi Álibek Tursymbetov rastady.
"Qala basshysynyń qoǵamdyq orynǵa maskasyz barý oqiǵasy qoldanystaǵy zańnama aiasynda aiaqtaldy. Ótken aptada zań buzýshylyq týraly tiisti hattama tirkelgennen keiin qala ákimi belgilengen aiyppuldy tóledi", - dedi ol Instagram jelisindegi paraqshasynda.
Sonymen qatar, onyń sózinshe, Jaqsylyq Omarmen bir is-sharaǵa qatysqan Olimpiada chempiony Olga Rypakova da maska taqpaǵany úshin aiyppul tólegen.
Aita keteiik, karantin talabyn buzǵan qala ákimi 15 AEK, iaǵni 43 755 teńge mólsherinde aiyppul tóledi.
