Óskemen qalasynyń ákimi Jaqsylyq Omar áleýmettik jeli arqyly óz úiiniń aýlasyndaǵy balalar alańynyń múshkil kúiin aitqan oqýshymen kezdesti, dep habarlaidy altaynews.kz saity.
Birer kún buryn birqatar buqaralyq aqparat quraldarynda óskemendik balaqaidyń túsirgen videosy taraǵan bolatyn. Onda ol kóp jyldan beri jóndeý kórmegen Maiakovskii, 20 meken jaiyndaǵy oiyn alańyn aralap, synyp bitken átkenshekterdi kórsetedi. «Balalardyń oinaǵysy keledi. Biraq «dvor» osyndai. Jaman. Túk oinai almaisyń. Balalar úiinde otyrady qamalyp», - deidi Dosjan esimdi oqýshy.
Al keshe, 5 sáýir kúni Óskemen basshysy Jaqsylyq Omar bala turatyn úidiń aýlasyn ózi baryp kórdi. Ákim Dosjanǵa belsendi azamattyq pozitsiiasy úshin alǵys bildirip, onyń áreketi qalanyń eresek turǵyndaryna úlgi bolatynyn aitty.
«Qazir qalada myńdaǵan aýla bar. Olardyń kóbine 40 jyldai ýaqyt jóndeý júrgizilmegen. Máseleni keshendi sheshý úshin oblys ákimi Danial Ahmetovtiń bastamasymen «Meniń aýlam» baǵdarlamasy júzege asyrylýda. PIK ótinish bergen barlyq aýla biýdjet esebinen tolyqtai jóndeletin bolady. Ókinishke orai, dál osy aýla ótken jyly ótinishti durys bermegen eken. Sonyń saldarynan aýla jóndeletinderdiń tizilimine kirmei qalǵan», - dep túsindirdi Jaqsylyq Omar.
Mamandardyń aitýynsha, mekeme baǵdarlama aiasynda aýlany jóndeýge ótinish jasaǵan. Biraq qujattar durys ázirlenbegendikten, ótinish qabyldanbaǵan. PIK-tiń jumysyna qanaǵattanbaitynyn turǵyndar da aitýda. Al kooperativtiń tóraǵasy bul kezdesýge kelmei qoiǵan.
Qala ákimi turǵyn úi jaǵdaiyn saqtaý men jaqsartý úshin turǵyndardyń belsendi qatysýy qajet ekenin eskertti. Sebebi PIK qyzmetin turǵyndardyń ózderi ǵana baqylai alady.
Al Dosjannyń aitqan nazyna keler bolsaq, Jaqsylyq Omar 2019 jyly jóndelýge tiis aýlalardyń tizimi bekitilip qoiǵanyn aitty. Degenmen, balanyń kóńilin qaldyrmai, belsendiligine qoldaý kórsetý úshin qala biýdjetinen únemdelgen qarajat esebine aýlany jóndetýge ýáde etti.
