ٶسكەمەن قالاسىنىڭ ەكٸمٸ جاقسىلىق ومار ەلەۋمەتتٸك جەلٸ ارقىلى ٶز ٷيٸنٸڭ اۋلاسىنداعى بالالار الاڭىنىڭ مٷشكٸل كٷيٸن ايتقان وقۋشىمەن كەزدەستٸ, دەپ حابارلايدى altaynews.kz سايتى.
بٸرەر كٷن بۇرىن بٸرقاتار بۇقارالىق اقپارات قۇرالدارىندا ٶسكەمەندٸك بالاقايدىڭ تٷسٸرگەن ۆيدەوسى تاراعان بولاتىن. وندا ول كٶپ جىلدان بەرٸ جٶندەۋ كٶرمەگەن ماياكوۆسكيي, 20 مەكەن جايىنداعى ويىن الاڭىن ارالاپ, سىنىپ بٸتكەن ەتكەنشەكتەردٸ كٶرسەتەدٸ. «بالالاردىڭ ويناعىسى كەلەدٸ. بٸراق «دۆور» وسىنداي. جامان. تٷك ويناي المايسىڭ. بالالار ٷيٸندە وتىرادى قامالىپ», - دەيدٸ دوسجان ەسٸمدٸ وقۋشى.
ال كەشە, 5 سەۋٸر كٷنٸ ٶسكەمەن باسشىسى جاقسىلىق ومار بالا تۇراتىن ٷيدٸڭ اۋلاسىن ٶزٸ بارىپ كٶردٸ. ەكٸم دوسجانعا بەلسەندٸ ازاماتتىق پوزيتسيياسى ٷشٸن العىس بٸلدٸرٸپ, ونىڭ ەرەكەتٸ قالانىڭ ەرەسەك تۇرعىندارىنا ٷلگٸ بولاتىنىن ايتتى.
«قازٸر قالادا مىڭداعان اۋلا بار. ولاردىڭ كٶبٸنە 40 جىلداي ۋاقىت جٶندەۋ جٷرگٸزٸلمەگەن. مەسەلەنٸ كەشەندٸ شەشۋ ٷشٸن وبلىس ەكٸمٸ دانيال احمەتوۆتٸڭ باستاماسىمەن «مەنٸڭ اۋلام» باعدارلاماسى جٷزەگە اسىرىلۋدا. پيك ٶتٸنٸش بەرگەن بارلىق اۋلا بيۋدجەت ەسەبٸنەن تولىقتاي جٶندەلەتٸن بولادى. ٶكٸنٸشكە وراي, دەل وسى اۋلا ٶتكەن جىلى ٶتٸنٸشتٸ دۇرىس بەرمەگەن ەكەن. سونىڭ سالدارىنان اۋلا جٶندەلەتٸندەردٸڭ تٸزٸلٸمٸنە كٸرمەي قالعان», - دەپ تٷسٸندٸردٸ جاقسىلىق ومار.
مامانداردىڭ ايتۋىنشا, مەكەمە باعدارلاما اياسىندا اۋلانى جٶندەۋگە ٶتٸنٸش جاساعان. بٸراق قۇجاتتار دۇرىس ەزٸرلەنبەگەندٸكتەن, ٶتٸنٸش قابىلدانباعان. پيك-تٸڭ جۇمىسىنا قاناعاتتانبايتىنىن تۇرعىندار دا ايتۋدا. ال كووپەراتيۆتٸڭ تٶراعاسى بۇل كەزدەسۋگە كەلمەي قويعان.
قالا ەكٸمٸ تۇرعىن ٷي جاعدايىن ساقتاۋ مەن جاقسارتۋ ٷشٸن تۇرعىنداردىڭ بەلسەندٸ قاتىسۋى قاجەت ەكەنٸن ەسكەرتتٸ. سەبەبٸ پيك قىزمەتٸن تۇرعىنداردىڭ ٶزدەرٸ عانا باقىلاي الادى.
ال دوسجاننىڭ ايتقان نازىنا كەلەر بولساق, جاقسىلىق ومار 2019 جىلى جٶندەلۋگە تيٸس اۋلالاردىڭ تٸزٸمٸ بەكٸتٸلٸپ قويعانىن ايتتى. دەگەنمەن, بالانىڭ كٶڭٸلٸن قالدىرماي, بەلسەندٸلٸگٸنە قولداۋ كٶرسەتۋ ٷشٸن قالا بيۋدجەتٸنەن ٷنەمدەلگەن قاراجات ەسەبٸنە اۋلانى جٶندەتۋگە ۋەدە ەتتٸ.
