Jambyl oblysy Sarysý aýdanynyń ákimi Baqytjan Jaqsylyqov qyzmetinen bosatyldy, dep habarlaidy "Ult aqparat".
Aqpanda Sarysý aýdanynyń ortalyǵy Jańatas qalasynda bes bala órt kezinde qaitys bolǵan edi.
"Qazaqstan Respýblikasy prezidenti ákimshiliginiń kelisimi boiynsha Jambyl oblysy ákiminiń ókimine sáikes, Jaqsylyqov Baqytjan Alpysuly Sarysý aýdany ákimi qyzmetinen bosatyldy", - delingen Jambyl oblysy ákimdiginiń resmi saitynda.
Baqytjan Alpysuly 1972 jyly Jambyl oblysy Sarysý aýdanynda dúniege kelgen.
Qazaq Ulttyq tehnikalyq ýniversitetin injener-qurylysshy mamandyǵy boiynsha bitirgen.
Eńbek jolyn 1995 jyly Qazaq ulttyq tehnikalyq ýniversitetinde oqytýshy bolyp bastaǵan.
Ár jyly Sarysý aýdany ákimi apparatynyń, aýdandyq zeinetaqy tóleý jónindegi ortalyǵynyń bas mamany, aýdan ákimi apparatynyń bas inspektory, bólim meńgerýshisi, shaǵyn jáne orta kásipkerlikti qoldaý jónindegi aýdandyq komitettiń tóraǵasy, Jańatas qalasynyń ákimi qyzmetterin atqarǵan.
2020 jyly Sarysý aýdanynyń ákimi bolyp taǵaiyndaldy.
Aita keteiik, Jańatas qalasy – Sarysý aýdanynyń ortalyǵy.
19 aqpanda Jańatas qalasynda páterde órt shyqty. Úide bir jastan alty jasqa deiingi 2 ul men 3 qyz bolǵan, bári kóz jumdy.
Oqiǵa saǵat 15.15-te 2-shi shaǵyn aýdanda bolǵan. 5-qabatty turǵyn úidiń 3-qabatyndaǵy kólemi 16 sharshy metr páterde órt shyqty. Úi zattary men jihaz janyp ketti.
Oqiǵa bolǵan sátte balalardyń ákesi jumysta bolǵan, anasy dúkenge shyǵyp ketken. Órt saldarynan kámelettik jasqa tolmaǵan barlyq balaǵa iis tiip, aýrýhanaǵa jatqyzyldy. Biraq biraz ýaqyttan keiin kóz jumdy.
Memleket basshysy osy oqiǵadan keiin bes balasy qaitys bolǵan otbasyǵa kóńil aitý jedelhatyn joldady.
Keiinirek 5 balasynan aiyrylǵan otbasyǵa páter berildi. Jerleý rásimin ákimdik ótkizip berdi. Demeýshiler qarajatyna 3 bólmeli páter alyndy. Jergilikti kásipkerler jihaz ben turmystyq tehnika alýǵa kómektesti.
