QR Premer-Ministri Asqar Mamin Tótenshe jaǵdailar ministrligi jańadan jobalanatyn kóppáterli turǵyn úilerdi avtomatty órt dabyly júielerine bailanysty túzetýler daiyndaǵanyn aitty, dep habarlaidy "Ult aqparat".
«Halyqaralyq tájiribeni eskere otyryp, 2018 jyly Tótenshe jaǵdailar ministrliginiń (burynǵy QR IIM Tótenshe jaǵdailar komiteti) bastamasy boiynsha QR Indýstriia jáne infraqurylymdyq damý ministrliginiń Qurylys jáne turǵyn úi-kommýnaldyq sharýashylyq isteri komiteti (IIDM Qurylys isteri komiteti) «Bir páterli turǵyn úilerdi jáne olardyń injenerlik júielerin jobalaý» QR QN 3.02-02-2018 qurylys normalaryna jeke turǵyn úilerdi derbes tútin órt datchikterimen jabdyqtaý boiynsha talap engizdi. Páterlerde adamdardyń jappai qaza tabýyna bailanysty Tótenshe jaǵdailar ministrligi aǵymdaǵy jaǵdaiǵa jáne kóppáterli turǵyn úilerge qoiylatyn talaptarǵa taldaý júrgizdi. Taldaý nátijeleri boiynsha Tótenshe jaǵdailar ministrligi qabattylyǵyna qaramastan, jańadan jobalanatyn kóppáterli turǵyn úilerdi avtomatty órt dabyly júielerimen, sondai-aq ýly gaz kontsentratsiiasynyń ruqsat etilgen deńgeiinen asqan kezde gaz berýdi avtomatty túrde toqtatatyn gazdanýdy baqylaý júielerimen jaraqtandyrý boiynsha, dybystyq signaly bar tútin habarlaǵyshtarymen mindetti jabdyqtaý bóliginde túzetýler daiyndady», - delingen Úkimet basshysynyń depýtattyq saýalǵan bergen jaýabynda.
A. Maminniń aitýynsha, qazirgi ýaqytta Tótenshe jaǵdailar ministrligi QR IIDM Qurylys isteri komitetimen birlesip, qurylys normalaryna osy túzetýlerdi engizý máselesin pysyqtap jatyr.
«Sonymen qatar jergilikti atqarýshy organdar halyqtyń osal toptarynyń turǵyn úilerin datchiktermen óteýsiz negizde jaraqtandyrý jumysyn azamattyq qorǵaý, áleýmettik qorǵaý, bilim berý jáne politsiia organdaryn tarta otyryp júrgizýde», - dedi Premer-Ministr.
Budan buryn habarlanǵandai, Májilistiń jalpy otyrysynda depýtattar adam ólimine ákep soqqan Jambyl, Qyzylorda oblystarynda jáne Petropavl qalasynda bolǵan qaiǵyly oqiǵalarǵa bailanysty Úkimet basshysynyń atyna depýtattyq saýal joldaǵan bolatyn.
Osy oraida depýtattar Prmeer-Ministr Asqar Maminnen Tótenshe jaǵdailar ministrligi óńirlerdiń ákimdikterimen birlesip, kópqabatty úilerge, ásirese ýaqytsha baspana men saiajailarǵa, basqa da jaily emes turǵyn úilerge árbir naqty jaǵdaida kómek kórsetý turǵysynan tolyq jumystardy júrgizýdi surady.
