Búgin Senattyń jalpy otyrysynda «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten, zań jobasy Májiliske qaitaryldy, dep habarlaidy QazAqparat.
«Elimizdiń egemendigin nyǵaitý jáne halyqtyń azyq-túlik qaýipsizdigin qamtamasyz etý maqsatynda, 2016 jylǵy 6 mamyrda QR Prezidentiniń Jarlyǵymen aýyl sharýashylyǵy jerlerin sheteldikterge, azamattyǵy joq adamdarǵa, sheteldik kompaniialarǵa, sondai-aq sheteldik úlesi bar qazaqstandyq kompaniialarǵa jalǵa berýge, sondai-aq Qazaqstan Respýblikasynyń azamattary men zańdy tulǵalaryna jeke menshikke berýge moratorii engizildi. Moratorii merzimi 2021 jyldyń 31 jeltoqsanynda aiaqtalatynyn eskere otyryp, Qazaqstan Respýblikasynyń Prezidenti Qasym-Jomart Kemeluly Toqaev aǵymdaǵy jyly 25 aqpanda Ulttyq qoǵamdyq senim keńesiniń besinshi otyrysynda jer máselesi qashanda halqymyz úshin asa mańyzdy ekendigin aita otyryp, sheteldikterge jáne sheteldik zańdy tulǵalarǵa aýyl sharýashylyǵy jerlerin satýǵa, jalǵa berýge zańnama júzinde birjola tyiym salýdy tapsyrdy», - dedi Aýyl sharýashylyǵy ministri Saparhan Omarov.
Atalǵan tapsyrmany Prezidenttiń zań shyǵarý bastamasy sheńberinde jedel júzege asyrý qajet dep sheshildi. Osyǵan bailanysty, tiisti zań jobasyn Parlament Májilisi maquldap, aǵymdaǵy jyldyń 14 sáýirinde Senatqa engizdi.
«Usynylǵan zań jobasynda aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysý úlesi bar ǵylymi ortalyqtarǵa, sondai-aq qandastarǵa berýge tolyqtai tyiym salý kózdelgen.
Budan basqa, Zań jobasynda budan buryn sheteldikter jáne sheteldik úlesi bar qazaqstandyq kompaniialar jalǵa alǵan aýyl sharýashylyǵy jerlerin paidalaný merzimi uzartylmaityny jáne olar paidalaný merzimi aiaqtalǵanǵa deiin ǵana ielikte bolatyny kózdelgen.
Al qandastar jer ýchaskesin jeke qosalqy sharýashylyq, baq ósirý jáne saiajai qurylysy úshin ala alady, aýyl sharýashylyǵy jerlerin Qazaqstan azamattyǵyn alǵannan keiin ǵana jalǵa alýǵa múmkindigi bar», - dedi ministr.
Zań jobasyn ekinshi oqylymda talqylaý barysynda senator Ábdáli Nuraliev qujattyń normalaryna qatysty Senattyń turaqty komitetteri men jekelegen Senat depýtattarynan 2 - usynys túskenin, olar Salystyrmaly kestege engizilgenin atap ótti.
«Atalǵan usynystar boiynsha jeke orman ósirý úshin jer ýchaskelerin tek Qazaqstan Respýblikasynyń azamattaryna jáne sheteldik úlesi joq Qazaqstan Respýblikasynyń zańdy tulǵalaryna berý týraly tiisti ózgeris pen tolyqtyrýdy Jer kodeksiniń 48-shi jáne 128-babyna engizý usynylyp otyr. Zań jobasy Qazaqstan Respýblikasynyń Konstitýtsiiasyna jáne qoldanystaǵy zańdaryna sáikes keledi.
Zań jobasyn qabyldaý quqyqtyq jáne áleýmettik-ekonomikalyq saldarynyń keri áserin tigizbeidi, memlekettik biýdjetten qosymsha qarjylardy talap etpeidi», - dedi Á. Nuraliev.
Talqylaý kezinde palata depýtattary atalǵan usynystarǵa qoldaý bildirdi.
