Birliktiń bastaýy bolǵan Ordabasy taýynyń biigine úsh bidiń eskertkishi ornatylmaq. Bul týraly Ońtústik Qazaqstan oblysynyń ákimi Janseiit Túimebaev oblystyq máslihattyń kezekti XIV sessiiasynda aitty, dep habarlaidy "Ult aqparat" OQO ákiminiń baspasóz qyzmetine silteme jasap.
«Ordabasy – «Aqtaban shubyryndy, Alqakól sulamadan» keiin qazaq halqy qaita eńsesin tiktep, «bir jeńnen qol, bir jaǵadan bas shyǵaryp», jaýǵa qarsy attanǵan jeri. Ordabasydaǵy Birliktóbe HVIII ǵasyrda úsh bidiń bastamasymen úsh júzdiń bekteriniń, igi jaqsylarynyń, batyrlary men sarbazdarynyń basy qosylyp, jońǵar shapqynshylaryna qarsy kúsh biriktirýge úndegen jer. Sondai-aq, osy qasietti jerde keler jyly 28 mamyrda Elbasy Nursultan Nazarbaevtyń Ordabasy taýynyń biiginde baiandama jasaǵanyna 25 jyl tolady. Bul tarihi data. Ol jerde stellalar tur. Meniń usynysym, tóbeniń basyna Alashtyń basyn qosqan úsh bi – Tóle, Qazybek jáne Áiteke bilerdiń eskertkishin ornatsaq, tamyry tereń Qazaq tarihyna jasalǵan qundy jádigerlerdiń biri bolar edi», - dedi ákim.
Búginde osynaý eskertkishtiń arhitektýralyq jumystary jasalynyp jatqanyn aitqan óńir basshysy onyń biiktigi 15-20 metr bolý qajet ekenin jetkizdi. Sondai-aq, 1 myń gektar aýmaqty alyp jatqan qasterli jerdiń kire berisine joldar men demalys oryndary, dámhanalar salynatynyn atap ótti.
Sonymen birge, ákim Elbasynyń «Bolashaqqa baǵdar: rýhani jańǵyrý» baǵdarlamalyq maqalasynda aitylǵan tarihta túrli ról atqarǵan qasietti oryndardy qolǵa alyp, ony damytý arqyly keleshek urpaqtyń boiyna sińirý jáne sonyń aiasynda otandyq týrizmdi de damytý baǵytyndaǵy birqatar jobalarymen bólisti.
Aita keteiik, 1993 jyldyń 26, 27, 28 mamyr kúnderi Ordabasynyń ushar biigindegi Birliktóbede (qazirgi Týtóbe) úsh júzdiń basy qosylǵan Tóle, Qazybek jáne Áiteke bilerdi - jaýǵa qarsy birigip, keńes qurǵan babalarymyzdy eske alýǵa arnalǵan uly basqosý ótkizilgen-di. 150 myńnan asa adam qatysqan bul jiynǵa baýyrlas elder - Ózbekstan men Qyrǵyzstan memleketteriniń sol kezdegi basshylary Islam Karimov pen Asqar Aqaev mártebeli meiman retinde kelgen bolatyn.
