11 sáýir kúni Ábilqaiyr han dańǵylyndaǵy kóp qabattty úiden shyqqan órtke bailanysty Aqtóbe oblysynyń ákimi Ońdasyn Orazalin shuǵyl jiyn ótkizdi. Jiynǵa oblys ákiminiń orynbasary, TJD bastyǵy, qala ákimi jáne jaýapty organdar basshylary qatysty.
Oblystyq tótenshe jaǵdailar departamentiniń bastyǵy Baýyrjan Syzdyqovtyń habarlaýynsha órt 9 qabatty №73 úidiń balkonynan shyqqan. Órt sóndirý jumysyna TJD-niń 29 qyzmetkeri men 8 birlik tehnikasy tartyldy. Órtten úidiń turǵyndary zardap shekken joq. Jalpy aýmaǵy 6 sharshy metrdi quraǵan órt ornynan 50 adam evakýatsiialandy.
Órt bolǵan jerge arnaiy kelip turǵyndarmen kezdesken O.Orazalin tústen keiin barlyq jaýapty memlekettik organdardy jinap, arnaiy tapsyrmalar berdi.
«Bul ekinshi ret qaitalanyp otyrǵan tótenshe jaǵdai. Osy jait turǵyndar tarapynan narazylyq týdyryp otyr. Aldaǵy ýaqytta mundai jaǵdailardy boldyrmaý maqsatynda jan jaqty jumys júrgizýimiz qajet. Qýanyshymyzǵa orai, órt sóndirý qyzmetiniń shuǵyl kelýiniń arqasynda adam shyǵyny bolǵan joq. Endigi mindet - qala turǵyndarynyń qaýipsizdigin qamtamasyz etý maqsatynda qala ákimdigi osyndai órt týdyratyn qaptaýlary bar barlyq turǵyn úilerdi anyqtap, esepke alýy tiis» - dedi oblys ákimi jaýapty mamandarǵa tapsyrma berip.
Aita keteiik, órt shyqqan úige órt sóndirýshiler 4 minýtta jetken. TJD qyzmetiniń alǵashqy zertteý jumystarynyń qorytyndysy boiynsha órttiń shyǵý sebebi óshpei qalǵan temeki nemese sirińkeniń 2013 jyly qaptalǵan úidiń syrtqy dekorativti qaptaýlaryna tiiýinen týyndaýy múmkin.
«Aqtóbe qalasy boiynsha qasbeti tez janatyn qurylys materialymen qaptalǵan 13 kópqabatty úi bar. Biz jergilikti ákimdikke habar berip, bárin aýystyrýdy suradyq. Qazir jumys atqarylyp jatyr. Aqtóbe oblysynyń ákimdigi qala ákimdigine tapsyrma berdi. Bárin almastyrýy múmkin», - dedi Aqtóbe oblystyq tótenshe jaǵdailar departamentiniń bastyǵy Baýyrjan Syzdyqov.
Aita keteiik, turǵyndar da tez tutanyp, janatyn qurylys materialyn múlde alyp tastaýdy surap otyr.
«Turǵyndar keide temeki tuqylyn tastaidy. Sol kezde de osyndai órt shyǵýy múmkin. Bizge ásemdik emes, qaýipsizdik qajet. Alǵash ret órt bolǵan kezde-aq alyp tastaýdy suradyq, biraq nátije shyqpai tur», - dedi PIK tóraiymy Tatiana Grechko.
