9-19 qarashada Germaniiada ótken 66-shy halyqaralyq Mangeim-Haidelberg (International Filmfestival Mannheim-Heidelberg) kinofestivalinde «Oralman» filmi úzdik jetistikteri úshin arnaiy júldemen marapattaldy, dep habarlaidy "Ult aqparat" «Qazaqfilm» kinostýdiiasynyń baspasóz qyzmetine silteme jasap.
Odan bólek, kinofestivaldiń uiymdastyrýshylary atalǵan kinotýyndyny Germaniiada prokatqa shyǵarýǵa usynys jasady.
Esterińizge sala ketsek, «Qazaqfilm» kinostýdiiasy túsirgen rejisseri Sábit Qurmanbekovtiń «Oralman» filmi atalǵan kinofestivaldiń negizgi baǵdarlamasyna iriktelinip alynǵan bolatyn. Biyl festivaldiń bas júldesine 22 elden 21 kartina talasqa túsken.
«Mádeni jáne dini ózgeshelikterine qaramastan, óz eline qaita oralǵan otbasynyń dramalyq oqiǵasy emotsionaldy áserli baiandalǵany úshin marapattalady» delingen festivaldiń resmi saitynda.
Mangeim-Geidelberg kinofestivaliniń nátijesi boiynsha, baiqaýdyń «Úzdik tolyqmetrajdy filmi» atty bas júldesi rejisser Vito Palmierimniń «Tehasta kórisermiz» atty italiialyq kartinaǵa buiyrdy. Al filippindik rejisser Bagane Fiol túsirgen «Ormandaǵy serýen» filmi festivaldiń arnaiy júldesimen marapattaldy. Sonymen qatar, «Kúzetshi» (Dominikan Respýblikasy, Pýerto-Riko, Braziliia), «Qasietti aýa» ( Izrail) jáne «Murtaza» (Túrkiia) atty filmder qazylar alqasynyń qurmetti syilyqtarymen marapattaldy.
66-shy Halyqaralyq Mangeim-Haidelberg (International Filmfestival Mannheim-Heidelberg) kinofestivaliniń halyqaralyq qazylar alqasynyń quramyna Germaniianyń tanymal kinematografisteri - Klaýdia Landsberger, Kristian Iýl Lemche jáne Klemens Klopfenshteinder kirdi.
Esterińizge sala ketsek, «Oralman» kórkem filmi osy jyldyń basynda Irannyń astanasy Tegeranda ótken 35-shi halyqaralyq Fadjr kinofestivali men XIII Halyqaralyq «Eýraziia» kinofestivaliniń Bas júldesin jeńip alǵan bolatyn. Filmde basty róldi somdaǵan akter Dýlyǵa Aqmolda qyrkúiek aiynda Tatarstanda ótken XIII Halyqaralyq musylmandar kinosy festivalinde «Úzdik er adam róli» júldesimen marapattaldy. Sondai-aq, kartina Italiiada ótken HH Halyqaralyq «Religion Today» kinofestivalinde «Úzdik film» nominatsiiasynda jeńiske jetip, táýelsiz SIGNIS qazylar alqasynyń arnaiy júldesin iemdendi.
Aita ketelik, Bashqurtstanda ústimizdegi jyldyń jeltoqsanynda ótetin IV Halyqaralyq «Kúmis Aqbozat» kinofestivaliniń ashylý saltanaty «Oralman» filmimen ashylady.
