Foto: BQO TJD
Oral qalasynda Shaǵan jáne Derkól ózenderi qaýipti deńgeiden asyp ketti. Shaǵan jáne Derkól ózeni bir arnady tolyq toǵysty. Jaiyq ózeniniń kóterilýi jáne atalmysh eki ózenniń toǵysýy sýdyń aǵyspen ketpei, syrtqa shyǵýyna alyp keldi, dep habarlaidy «Ult aqparat» BQO TJ departamentiniń baspasóz qyzmetine silteme jasap.
Mamandardyń baǵalaýynsha, Derkól ózeniniń gidrobeketinde sý deńgeii 708 (qaýipti deńgeii – 600-650 sm), Shaǵanda 1 264 santimetrge, sondai-aq Jaiyqta 583 santimetrge jetti.
Sonyń saldarynan ózen sýlary arnaǵa syimai, Oral qalasyndaǵy Samal shaǵyn aýdanyna jaiyla bastady.
Qazirgi ýaqytta Samal shaǵyn aýdanynyń turǵyndaryn qaýipsiz jerlerge, evakýatsiialyq pýnktterge kóshirý júrgizilýde. Tótenshe jaǵdailar men kommýnaldyq qyzmet mamandary jumys istep jatyr.
BQO ákimi Nariman Tóreǵaliev Samal shaǵyn aýdanyna baryp, jaǵdaidy jiti baqylaýda ustap otyr. Tiisti jumystar júrgizilýde.
BQO TJ departamentiniń baspasóz qyzmetinen málim etkenindei, qutqarýshylar Derkól kenti qazaq-túrik litseii aýdany jáne "Samal 3" shaǵynaýdanynda aýlalardy qarap shyqty. Turǵyndardyń jartysynan kóbi týystaryna aldyn ala ketken. Qalǵandary evakýatsiiadan bas tartty.
"Jaryq bar, tuiyqtalýdan qamtamasyz etildi. Evakýatsiialaýǵa BQO TJD jeke quramy, apattar meditsinasy ortalyǵy, № 28237 áskeri bólimi, Ulttyq ulannyń № 5517 áskeri bólimi, aýmaqtyq qorǵanys arnaiy tehnikalarmen qatysýda. Oblys jáne qala basshylary, TJD bastyǵy oqiǵa ornynda. Tótenshe jaǵdailar, politsiia departamentterimen kezekshilik uiymdastyrylǵan. Turǵyndardan dúrbeleńge túspeýdi, tótenshe jaǵdailar departamenti men jergilikti atqarýshy organdardyń usynystaryna sáikes áreket etýdi jáne qajet bolǵan jaǵdaida qaýipsiz jerlerge kóshýdi suraimyz. Kómek qajet jaǵdaida 112 telefonyna habarlasýǵa bolady", – dedi departamenttiń baspasóz qyzmeti.
Sonymen qatar sý basý qaýpi tóngen Terekti aýdany Uzynkól aýylynan 705 adam kóshirilse, sonyń 230-y – balalar. Olardyń 685-i (223-i – balalar) týystaryna ketse, qalǵandary Terekti aýdany Podstepnyi aýylyndaǵy jáne Oral qalasyndaǵy mektepterge ornalastyryldy.
