Oralda quny 7 mlrd teńge turatyn jylyjai kesheni salynýda, dep habarlaidy "Ult aqparat".
BQO ákimdigi málim etkenindei, «Oral jylyjai kombinaty» JShS 5 gektar aýmaqta atalmysh keshendi niderlandylyq tehnologiia negizinde turǵyzýda.
Jylyjai jylyna 3 myń tonna kókónis óndire alady. Keshen iske qosylǵan kezde 100 jańa jumys orny ashylady dep josparlanýda.
BQO kásipkerlik jáne indýstrialdyq-innovatsiialyq damý basqarmasy basshysynyń orynbasary Maqsat Qulanbaevtyń aitýynsha, keshenniń qurylysy negizinen bitip tur.
«Keshenniń qural-jabdyqtaryn sheteldik mamandar kelip ornatýy kerek. Ázirge olar koronavirýs indetine bailanysty kele almai otyr. Jylyjai keshenin qyrkúiek aiynda paidalanýǵa berý kózdelýde», dedi QazAqparat tilshisine M.Qulanbaev.
Aita keteiik, ákimdik derekterine qaraǵanda, aýyl sharýashylyǵy salasynda taǵy bir iri investitsiialyq jobany «Kýblei» JShS qolǵa aldy. Munda aýysymyna 600 dana iri qara men usaq mal terisin óńdeitin tseh qurylysy júrgizilýde. Bul jobanyń quny – 700 mln teńge.
Biyl aýyl sharýashylyǵy salasyn qoldaýǵa biýdjetten 17 mlrd teńge bólindi. Jyl basynan beri aýyl sharýashylyǵy taýaryn óndirýshiler 4,3 mlrd teńge nesie kózderine qol jetkizdi.
Tórt aidaǵy aýyl sharýashylyǵynyń jalpy ónimi 27 mlrd teńgeni qurady. Salaǵa 1,6 mlrd teńge investitsiia tartyldy, bul ótken jylǵy osy kezeńdegiden 1,4 esege artyq.
Eske sala keteiik, budan buryn Batys Qazaqstanda 516 myń gektarǵa aýyl sharýashylyǵy daqyldary sebilgenin jazǵan bolatynbyz.
