Oralda elektr baǵanynyń basyna shyǵyp, sekirmek bolǵan 17 jastaǵy qyz qutqaryldy, dep habarlaidy "Ult aqparat".
BQO politsiia departamentiniń resmi ókili, politsiia polkovnigi Bolatbek Belgibekovtiń málim etkenindei, oqiǵa 18 naýryz kúni keshkisin oryn aldy.
Saǵat 20.10-da Qazaqstan men Isatai batyr kósheleriniń qiylysynda joǵary voltty temir baǵannyń basynda jasóspirim qyzdyń sekirmek bolyp otyrǵany jóninde 102 telefonyna qońyraý shalynǵan.
Oqiǵa ornyna politsiia jáne TJ departamenti qyzmetkerleri jetti. Sodan keiin sol aýdan elektr qýatynan ajyratyldy. Keiin mektep direktory da keldi.
Saǵat 21.45-te qutqarýshylar baǵanǵa shyǵyp, qyzdy aman-esen túsirip aldy.
«2002 jylǵy E. esimdi jasóspirim keshki mektepte oqidy. Qaraýsyzdar sanatyna jatatyn qyz iývenaldy politsiia esebinde turady. Birneshe ret úiinen qashyp ta ketken. Oqiǵanyń jai-japsary anyqtalý ústinde», dedi QazAqparat tilshisine B.Belgibekov.
BQO TJ departamenti zilzalalardyń qaýip-qaterin azaitý jáne azamattyq qorǵaý salasyndaǵy baqylaý basqarmasynyń bastyǵy Erlan Tóregeldievtiń naqtylaýynsha, jedel qutqarý jasaǵynan 4 adam, 1 tehnika bardy.
Sýitsidke jol bermegen jedel qutqarý jasaǵynyń bas qutqarýshy-psihology Nurmuhan Jumaǵalievti erekshe atap ótken jón.
Qutqarylǵan qyz jedel járdem brigadasyna tapsyryldy.
