Oralda dárihanalarda joq dárilerdi zańsyz satqan turǵyn jaýapqa tartyldy, dep habarlaidy "Ult aqparat".
QR Sybailas jemqorlyqqa qarsy is-qimyl agenttigi BQO boiynsha departamenti basshysynyń birinshi orynbasary Nurdáýlet Samettiń brifingide málim etýinshe, Memleket basshysy Qasym-Jomart Toqaevtyń tapsyrmasyna sáikes karantin kezinde óńirde farmatsevtikalyq qyzmettiń durys júzege asyryrylýyn qamtamasyz etý maqsatynda arnaiy monitoringtik toptar jumys isteýde.
Atalǵan toptar qala men aýdandarda kúni búginge deiin 300-den astam dárihanaǵa monitoring júrgizdi.
Is-sharalar barysynda zańbuzýshylyq anyqtaldy. Atap aitqanda, 14 shilde kúni departamentke karantin kezinde bir azamattyń Oral qalasynyń dárihanalarynda joq dári-dármekti (ingavirin, tseftriakson, azitrimitsin) zańsyz satyp júrgeni týraly aryz tústi.
Sol kúni ótinish berýshiniń qatysýymen atalǵan turǵynnan 5 qorap ingavirin, 5 qorap azitrimitsin jáne 38 ampýla tseftriakson satyp alyndy. Munyń jalpy quny 66 830 teńgeni qurady.
Material QR Ákimshilik quqyqbuzýshylyq kodeksiniń 424 jáne 426-baptaryna sáikes BQO taýarlar men kórsetiletin qyzmetterdiń sapasy men qaýipsizdigin baqylaý departamentine joldandy.
«Atalǵan azamatqa qatysty eki ákimshilik hattama toltyrylǵan bolatyn. Sonyń nátijesinde dári-dármekti litsenziiasyz satqany úshin oǵan sot sheshimimen aiyppul salyndy. Al tirkelmegen dári-dármekti satý deregi boiynsha is sotta qaralýda», - dedi N.Samet.
Onyń sózine qaraǵanda, sonymen qatar Prezidenttiń «SQ-Farmatsiia» JShS qyzmetinde sybailas jemqorlyq táýekelderiniń bolýyna taldaý jasaý týraly tapsyrmasyna sáikes COVID-19 álemdik pandemiiasy kezinde Qazaqstanǵa keletin barlyq gýmanitarlyq kómektiń sońǵy tutynýshyǵa deiin jetýi baqylanýda.
Qazirgi tańda Katardan, Dúniejúzilik densaýlyq saqtaý uiymynan, Qytaidan, Resei men Ózbekstannan gýmanitarlyq kómek kelip jetti. Sonyń ishinde «Koronavir» dárisi jáne jeke qorǵanys quraldary bar. Alypsatarlyq derekterin boldyrmaý maqsatynda ár dári-dármek pen jeke qorǵanys quraldary arnaiy «BQO Gýmanitarlyq kómek Tegin» mórtańbasymen tańbalandy.
«Bul gýmanitarlyq kómekter BQO sybailas jemqorlyqqa qarsy qyzmet, «Halyqtyq baqylaý» komiteti, qoǵam ókilderi men eriktilerdiń qatysýymen oblystyq, qalalyq jáne aýdandyq aýrýhanalarǵa, provizorlyq statsionarlarǵa jetkizilýde», - dedi Nurdáýlet Samet.
