Oral qalasynda bir ailyq mólsherdegi qar tústi, dep habarlaidy QazAqparat.
Oral qalasy turǵyn úi-kommýnaldyq sharýashylyǵy jáne turǵyn úi inspektsiiasy bóliminiń basshysy Jandos Dúisenǵalievtiń málim etkenindei, ótken demalys kúnderindegi aýa raiynyń qolaisyzdyǵynan (boran men qar) 2 myńnan astam abonent elektr jaryǵynsyz qaldy.
Onyń sózine qaraǵanda, 25-26 jeltoqsan kúnderi elektr jelilerindegi apattar boiynsha 100-den astam ótinim tústi.
Jaýǵan qardyń kóptiginen negizinen áýe jelileri úzildi. «Qurylysshy», «Kýreni» shaǵynaýdandary men Zachagan kentinde 8 brigada 10 tehnikamen jumys jasady.
Qar tazartý jumystaryna 115 avtotehnika, 250 jumysshy jumyldyryldy. Bir jarym táýlik ishinde qaladan 10 myń tekshe metr, al qar jaýý bastalǵannan beri barlyǵy 25 150 tekshe metr qar shyǵaryldy.
Qalada bir kúnde bir ailyq mólsherdegi qar túsip, biiktigi 15 santimetrge jetti.
Qar tazartý jumystary odan ári jalǵasýda.
«Oǵan qosa ótken demalys kúnderi qalanyń birneshe aýdanynda 15 700 abonent sýsyz qaldy. Jóndeý jumystary nátijesinde sý berý tez qalpyna keltirildi», dedi Dúisenǵaliev.
