Foto: Pavlodar oblysy óńirlik jedel járdem stansasy
Oral qalasynda adam ólimine soqtyrǵan jol-kólik oqiǵasy boldy. Oqiǵa 20 maýsym kúni S. Datuly kóshesi boiynda kópirde boldy, dep habarlaidy BQO politsiia departamentiniń baspasóz qyzmeti.
— Shamamen saǵat 17.30-da 2011 jylǵy qyz belgilenbegen jerden joldan júgirip ótip bara jatqanda, ony 1999 jylǵy júrgizýshi aidaǵan «Lada Granta» avtokóligi qaǵyp ketken. Jedel járdem qyzmetkerleri qyzdyń janyn aman alyp qalýǵa tyrysqanymen, ol esin jimastan, oqiǵa ornynda kóz jumdy, — dep habarlady vedomstvodan.
Qazirgi kezde oqiǵanyń jai-japsary anyqtalý ústinde.
Jol apatyna bailanysty sol tusta kólik keptelisi boldy.
Eske sala keteiik, budan buryn Oralda top bolyp jinalǵan 21 jasóspirimniń politsiiaǵa jetkizilgenin jazǵan bolatynbyz.
