Oral qalasynda aýlada júrgen itterdiń atylýyna bailanysty áleýmettik jelide taraǵan beinejazba turǵyndardyń narazylyǵyn týǵyzdy. Oqiǵaǵa qatysty Batys Qazaqstan oblystyq politsiia departamenti túsinikteme berdi, dep habarlaidy ult.kz.
Áleýmettik jelide jariialanǵan beinejazbada er adamnyń aýlada júrgen itterge oq atqany kórinedi. Turǵyndardyń aitýynsha, videony balalar túsirip alǵan. Oqiǵa keshki saǵat 20:00 shamasynda mektep mańynda bolǵan.
«Oiyn alańynda úsh mas er adam tynysh jatqan itterdi atyp tastady. Balalar olardy toqtatýǵa tyrysqanymen, tyńdamaǵan. Olar barlyq itti osylai atatynyn aitty», – dep jazdy turǵyndardyń biri.
Alaida politsiianyń málimetinshe, 12 shilde kúni «102» arnasyna Oral qalasynyń turǵynyn qańǵybas it qaýyp alǵany týraly habarlama túsken. Oqiǵa ornyna ýchaskelik politsiia inspektory baryp, zardap shekken adamǵa alǵashqy kómek kórsetilip, ol Oral qalalyq kópsalaly aýrýhanasyna jetkizilgen.
Vedomstvonyń habarlaýynsha, osydan keiin jábirlenýshiniń kúieý balasy óz bastamasymen qaraýsyz qalǵan janýarlardy aýlaýmen ainalysatyn mamandandyrylǵan uiym qyzmetkerlerin shaqyrǵan.
«Mamandandyrylǵan seriktestik qyzmetkerleri qaraýsyz qalǵan janýarlardy aýlaý jumystaryn júrgizdi. Atalǵan fakti boiynsha politsiia tiisti materialdardy jinady», – dep málimdedi oblystyq politsiia departamenti.
Politsiia qaraýsyz qalǵan janýarlardy aýlaý máselesi jergilikti atqarýshy organdar men mamandandyrylǵan uiymdardyń quzyretine jatatynyn atap ótti.
