Oralda ornalasqan Ulttyq ulannyń «Batys» óńirlik qolbasshylyǵynyń 5517 áskeri bóliminde Aqtaýdan kelgen aǵaiyndy úshem merzimdi áskeri qyzmetin atqaryp júr. Bul jaiynda Ulttyq ulannyń «Batys» óńirlik qolbasshylyǵy habarlady.
18 jasar úshem Aqarys, Bekarys jáne Janarys Zekkenovter osy jyldyń kókteminde quqyqtyq tártip áskeriniń qataryna shaqyrylǵan.
Aǵaiyndy Zekkenovter dúnie esigin ashqaly beri árqashan birge. «Bolashaq» akademiiasynyń kolledjin «Sý kóligin paidalaný» mamandyǵy boiynsha bitirgennen keiin balalardy merzimdi qyzmetke shaqyrǵan. Sol kezde de olar ajyratpaýdy ótingen. Oǵan jergilikti qorǵanys ister departamenti qol ushyn sozyp, bir áskeri bólimge jiberdi.
Úshem psihologiialyq test tapsyrǵan kezde olardyń túr-álpeti bir-birine sáikes keldi. Aǵaiyndylardyń ózderi buǵan úirenip qalǵan.
«Alaida bir aiyrmashylyq bar: Aqarystyń boiy eki baýyrynan tórt santimetrge uzyn – 178 bolsa, Bekarys pen Janarystyń boiy - 174 santimetr. Alaida bul aǵaiyndylardyń dene shynyqtyrýda birdei nátije kórsetýine kedergi keltirmeidi. Olar áskerge daiyndalý barysynda arnaiy sportpen shuǵyldanyp, 100 m jáne 3 shaqyrymǵa júgirýde jáne bel temir tartylýda birdei kórsetkish kórsetti. Úsheýi de sportpen ainalysady. Aqarys pen Bekarys toǵyz jasynan bastap «karate-do» sport sektsiiasyna qatysqan. Sol ýaqyt ishinde aǵaiyndylar «karate-do» boiynsha oblystyq jáne qalalyq sport týrnirlerine qatysyp, birneshe ret júldeli oryndarǵa ie boldy. Al Janarys sambo kúresinen sport sheberiniń kandidaty atandy» dep málim etti «Batys» óńirlik qolbasshylyǵy baspasóz qyzmetiniń jetekshisi, podpolkovnik Erbolat Sultanov.
Aita keteiik, 5517 áskeri bóliminde úshemniń áskerge shaqyrylý jaǵdaiy eshqashan bolmaǵan.
«Quqyq tártibi áskerinde qyzmet etkenimdi maqtan tutamyn. Sebebi, Ulttyq ulan qatarynda qyzmet etý, ómirde laiyqty ornyńdy tabýǵa kómektesetin barlyq zamanaýi jaǵdailarǵa ie bolý - el Prezidentiniń jastarǵa qamqorlyǵynyń nátijesi», - deidi Bekarys Zekkenov.
«Ulttyq ulan áskerlerine merzimdi qyzmetke qazir shynymen de úzdik jastar keledi, - deidi 5517 áskeri bólimi batalon komandiriniń tárbie jáne áleýmettik-quqyqtyq jumystar jónindegi orynbasary, kapitan Damir Jákenov. - Jaýapty, saýatty, rýhy men denesi myqty, moraldyq turǵydan shynyqqan. Óitkeni, qysqa merzim ishinde biz olardy naǵyz Otan qorǵaýshy etip daiyndap shyǵarýymyz kerek. Meniń tájiribemde aǵaiyndy úshemniń merzimdi áskeri qyzmet ótkerýi - birinshi jaǵdai. Buǵan deiin tek egizderdi kórgenmin. Qazir aǵaiyndy úshem Oral qalasynda qoǵamdyq tártipti jáne qoǵamdyq qaýipsizdikti qorǵaý qyzmetin minsiz, abyroimen atqaryp keledi».
Otan aldyndaǵy áskeri boryshyn aiaqtaǵannan keiin aǵaiyndy Zekkenovter týǵan qalasy Aqtaýǵa oralady. Sodan keiin olar joǵary bilim alyp, zańger mamandyǵyn meńgerýdi, ishki ister organdaryna jumysqa ornalasýdy josparlap otyr.
