Oralda 11 jasar balany qaǵyp ketken avtokólik júrgizýshisi izdestirilip jatyr, dep habarlaidy QazAqparat.
BQO politsiia departamentiniń baspasóz qyzmeti málim etkenindei, oqiǵa 24 mamyr kúni Iu.Gagarin men Jánibek kósheleriniń qiylysynda boldy.
«Úmit» dúkeni janyndaǵy jaiaý júrginshi ótkelinde aldyn ala málimet boiynsha aq tústi «Toyota» avtokóligi balany qaǵyp ketken. Sodan keiin júrgizýshi jasóspirimdi úiine deiin jetkizip, ózi boi tasalaǵan.
«Balanyń anasy saǵat 17.40-ta politsiiaǵa júgindi. Jetkinshek jaraqat pýnktinde tekserilgennen keiin qanshalyqty zardap shekkeni belgili bolady. Qazirgi kezde atalǵan avtokólikti izdestirýge departamenttiń jeke quramy jumyldyryldy. QR Ákimshilik quqyqbuzýshylyq kodeksi 611-babyna sáikes ákimshilik is qozǵaldy», - dep habarlady vedomstvodan.
BQO densaýlyq saqtaý basqarmasynyń baspasóz qyzmeti oqiǵanyń jai-japsary anyqtalyp jatqanyn jetkizdi.
