Oralda túrmede jazasyn óteýshiler tóbelesip, 10 adam jaraqat aldy, dep habarlaidy QazAqparat.
BQO boiynsha qylmystyq-atqarý júiesi departamentiniń baspasóz qyzmeti málim etkenindei, oqiǵa 10 mamyr kúni shamamen saǵat 05.00-de qaýipsizdigi ortasha RÝ-170/2 mekemesinde boldy.
Mekeme jataqhanasynda jazasyn óteýshiler bir-birimen sózge kelip, sońy buzaqylyq áreketke ulasqan. 10 minýt ishinde kezekshi jasaqtyń kúshimen tóbeles toqtatylǵan. Barlyq qatysýshylarǵa alǵashqy meditsinalyq járdem kórsetilip, oblystyq kópbeiindi aýrýhanaǵa jetkizilgen. Jazasyn óteýshilerdiń ómirine qaýip joq.
«Atalǵan derek boiynsha Oral qalasy politsiia basqarmasy Zachagan politsiia bólimi qyzmetkerlerimen QR QK 107-baby 2-bóligine (densaýlyqqa qasaqana aýyrlyǵy ortasha ziian keltirý) sáikes sotqa deiingi tergeý amaldary júrgizilýde. Kúni búgin jazasyn óteýshiler tarapynan aryz-shaǵym túsken joq. Qyzmettik tekserý taǵaiyndaldy», dep habarlady vedomstvodan.
BQO politsiia departamentiniń baspasóz qyzmetinen túsken málimetke qaraǵanda, oqiǵa saldarynan jaraqat alǵan 1985 jylǵy jazasyn óteýshi dáriger qaraǵannan keiin oblystyq aýrýhananyń jansaqtaý bólimine jatqyzylǵan. 1992 jáne 1988 jylǵy jazasyn óteýshiler dárigerler qaraǵannan keiin keri qaitarylǵan. Oqiǵa ornynan uzyndyǵy 1 metr 6 dana metall turba, uzyndyǵy 1 metr 3 dana aǵash taiaq, qara-qońyr daqtar alynǵan.
BQO densaýlyq saqtaý basqarmasynyń naqtylaýynsha, barlyǵy 10 adam jaraqat alǵan. Olardyń ekeýi meditsinalyq kómekten bas tartty. Jeteýi qalalyq kópbeiindi aýrýhanaǵa jetkizildi. Kómek kórsetilgennen keiin otyrǵan jerlerine qaitaryldy. Tómengi jaq súiegi synǵan bir adam oblystyq aýrýhanaǵa jatqyzyldy.
