Oral qalasynda eriktiler búgin 40 myń meditsinalyq maskany tegin taratty, dep habarlaidy "Ult aqparat".
BQO jastar saiasaty máseleleri jónindegi basqarmanyń qoldaýymen «Jaqynyńa janashyr bol! Maska taǵaiyq!» sharasy aiasynda úlestirilgen ár qoraptyń ishinde 3 dana meditsinalyq maska bar.
Shahardyń volonter qyz-jigitteri 23 shilde kúni «Jasyl el» shtabynda jinalyp, 40 myń maskany qabyldap aldy. Arnaiy qorǵanysh kiimin kigen eriktilerdiń bir bóligi maskalardy shaǵyn qoraptarǵa salsa, ekinshi top aldyn ala daiyndalǵan arnaiy kólikterge tiedi.
«Oral jastary» qozǵalysynyń volonteri Dýlat Júsipqalievtiń aitýynsha, árkim koronavirýs qateriniń seiilmegenin jete túsinip, qorǵaný quraldarynyń infektsiianyń taralýyn azaitýǵa septigin tigizetinin uǵynýy mańyzdy.
«Karantin ýaqytynda, ókinishke qarai, keibir azamattar qarapaiym saqtyq sharalaryn eskermeidi. Qoǵamdyq oryndarda, kóshelerde serýendeý kezinde meditsinalyq maska taqpaidy, araqashyqtyqty saqtamaidy. Sondyqtan túrli sebeptermen betperdesiz júrgen qala turǵyndaryna eriktiler saqtyq sharalaryn eske sala otyryp, meditsinalyq maskalar men únparaqtar usyndy. Mundai jumystar oblystyń barlyq aýdandarynda júrgizilýde», dedi D.Júsipqaliev.
Sharaǵa 150-den astam «Jasyl el» sarbazdary, «Oral jastary», «Aqjaiyq jastary» volonterleri atsalysty.
