"Abai ulttyq mektebine" qatysty jariialanǵan materialda kóterilgen máseleler Oqý-aǵartý ministrliginiń baqylaýynda, dep habarlaidy ult.kz.
Bul týraly Oqý-aǵartý ministrligi Orta bilim komiteti tóraǵasynyń mindetin atqarýshy Jomart Karambaev málimdedi.
Onyń aitýynsha, mektepke júrgizilgen aýdit 2023 jylǵy 1 qańtardan 2025 jylǵy 31 jeltoqsanǵa deiingi kezeńdi qamtyǵan. Aýdit qorytyndysy 9 shildede ministrliktiń resmi resýrsynda jariialanǵan.
– Eń aldymen, mektep basshysyz qalǵan joq. Qazirgi ýaqytta direktordyń mindetin atqarýshy belgilengen, bilim berý protsesiniń úzdiksizdigi qamtamasyz etildi. Mekteptiń burynǵy basshylyǵy 2026 jylǵy mamyr-maýsym ailarynda júrgizilgen ishki memlekettik aýdit aiaqtalǵannan keiin óz erkimen qyzmetten ketti, – dedi Karambaev.
Tekserý nátijesinde jalpy somasy 10,8 mlrd teńgeden astam buzýshylyq anyqtalǵan. Onyń 10,4 mlrd teńgesi qarjylyq buzýshylyqtarǵa jatady.
Atap aitqanda, 10,2 mln teńge biýdjetke qaitarylýy, al 10,4 mlrd teńge qalpyna keltirilýi tiis. Sonymen qatar 370,6 mln teńge kóleminde rásimdik buzýshylyq tirkelgen.
– Aýdit nátijesi boiynsha quqyq qorǵaý organdaryna sheshim qabyldaý úshin 4 material joldandy. Sondai-aq ákimshilik quqyq buzýshylyqtar boiynsha 24 aiyppul salýǵa qatysty qujattar jiberildi. Naqty tulǵalardyń kinási men jaýapkershiligi ýákiletti organdardyń quzyrynda, – dedi Orta bilim komiteti tóraǵasynyń mindetin atqarýshy.
Jomart Karambaev turaqty direktordy taǵaiyndaý máselesi de qarastyrylyp jatqanyn aitty. Bul rette 2026 jylǵy 1 shildeden bastap kúshine engen "Qazaqstan Respýblikasynyń memlekettik qyzmeti týraly" jańa zań talaptary eskerilip otyr.
Zańnyń 89-babyna sáikes memlekettik zańdy tulǵalardaǵy basqarýshylyq laýazymdarǵa qabyldaý konkýrs arqyly júzege asyrylady. Konkýrs ótkizý tártibin memlekettik qyzmet isteri jónindegi ýákiletti organ Qazaqstan Respýblikasy Úkimetiniń apparatymen kelisip bekitýi tiis.
– Qazir tiisti qaǵidalar bekitilý rásiminen ótip jatyr. Olar kúshine engenge deiin ministrliktiń konkýrs ótkizýge nemese turaqty direktordy tikelei taǵaiyndaýǵa quqyqtyq negizi joq. Konkýrstan tys taǵaiyndaý zań talaptaryn buzady. Qaǵidalar kúshine engennen keiin direktordyń bos laýazymyna ashyq konkýrs jariialanady. Qazir Oqý-aǵartý vitse-ministri Jaiyq Sharabasov, Qarjy jáne memlekettik satyp alý departamenti direktorynyń orynbasary Elnar Sabyr jáne Y. Altynsarin atyndaǵy Ulttyq bilim akademiiasynyń vitse-prezidenti Gúlshat Muhtarhanova "Abai ulttyq mektebinde" jumys júrgizip jatyr. Ministrliktiń ókilderi mekteptegi oqý protsesiniń uiymdastyrylýyn baqylaidy. Osyǵan bailanysty ata-analardy, pedagogterdi, oqýshylardy jáne mektep túlekterin resmi aqparatqa súienýge, tekserilmegen málimetterdi taratpaýǵa jáne asyǵys qorytyndy jasamaýǵa shaqyramyz. Júrgizilip jatqan jumystyń qorytyndysy boiynsha qosymsha aqparat beriledi, – dep túiindedi ol.
