Koreia Respýblikasynyń biligi sybailas jemqorlyq jáne qyzmettik ókilettigin asyra paidalandy degen aiyppen 22 jylǵa sottalǵan burynǵy prezident Pak Kyn Hege raqymshylyq jasaidy, dep habarlaidy QazAqparat Yonhap agenttigine silteme jasap.
Agenttik málimetinshe, 69 jastaǵy Pak Kyn He jańa jyl qarsańynda raqymshylyqqa ilinetin adamdardyń tizimine engizilgen. Tiisti sheshim onyń densaýlyq jaǵdaiyn eskere otyryp, gýmanitarlyq sebeptermen qabyldanǵan. 2019 jyly Pak Kyn He iyǵyna ota jasatqan, al biyl eks-prezident iyq pen omyrtqadaǵy sozylmaly aýrýǵa bailanysty úsh ret aýrýhanaǵa túsken.
Pak Kyn He tóńiregindegi saiasi janjal 2016 jyldyń qazan aiynda onyń qurbysy Chhve Sýn Sildiń memleket basshysyna áseri týraly aqparat baspasózde paida bolǵan kezde týdy. Janjalǵa qatysty tergeý onyń birneshe jyl boiy úkimettiń egjei-tegjeiinen habardar bolyp, saiasi sheshimder qabyldaýǵa aralasqanyn kórsetti. Sonymen qatar, prezidenttiń qurbysy birqatar kompaniialarǵa qysym kórsetip, onyń qaramaǵyndaǵy qorlarǵa ondaǵan million dollar aýdarýǵa májbúrlegen.
Sybailas jemqorlyq faktileri jáne Chhve Sýn Sildiń memlekettik qyzmetke zańsyz qatysý áreketteri anyqtalǵannan keiin búkil elde iri sherýler tolqyny ótip, oǵan qatysýshylar prezidenttiń dereý otstavkaǵa ketýin jaqtady. Parlament sheshimimen Pak Kyn He qyzmetinen bosatylyp, keiin qamaýǵa alyndy.
Ońtústik Koreia sarapshylarynyń pikirinshe, eldiń burynǵy kóshbasshysynyń bosatylýy kelesi jyldyń naýryz aiyndaǵy prezidenttik sailaýǵa áser etedi.
