Ońtústik Koreiada koronavirýs jaǵdaiynyń qaita órshýi eldegi basqarý júiesine áser ete bastady. Beisenbide parlament jabylyp, bileýshi partiianyń keibir qyzmetkerleri úidegi karantinge alyndy, dep habarlaidy QazAqparat Kiodo agenttigine silteme jasap.
Bir kún buryn Koreianyń basqarýshy demokratiialyq partiiasynyń joǵary laýazymdy tulǵalarynyń Ulttyq jinalysta kezdesýi ótken bolatyn. Sol kezdesýden keiin jergilikti reporter virýsqa oń nátije kórsetip, atalmysh sharalar qabyldandy. Parlament ǵimaraty men depýtattardyń kabinetteri dezinfektsiialanǵandyqtan, beisenbige josparlanǵan birneshe parlament otyrysy men bileýshi jáne oppozitsiialyq depýtattar arasyndaǵy kezdesýler toqtatyldy.
Reporterdiń kem degende 50 adammen, onyń ishinde spiker Pak Ben Seg jáne bileýshi partiianyń basqa da depýtattarymen bailanysqany anyqtaldy.
Bul jaǵdai bir palataly zań shyǵarý jinalysynyń kúzge arnalǵan 300 oryndyq jumys kestesin keiinge qaldyrýǵa týra kelýi múmkin degen alańdaýshylyq týdyryp otyr, dep habarlaidy Yonhap agenttigi.
Aita ketsek, biliktegi partiianyń kóshbasshylyǵy úshin básekelerdi senbi kúni onlain ótkizý josparlanǵan bolatyn.
Ońtústik Koreia beisenbi kúni virýs juqtyrýdyń 441 jańa jaǵdaiy týraly habarlady. Bul – naýryzdan bergi eń kóp ósim. Virýs órship turǵan Seýlde aýrýdyń 154 jaǵdaiy tirkeldi. Koreia astanasy úshin bul koronavirýs indeti kezindegi eń kóp kórsetkish.
