QR DSM Taýarlar men qyzmetterdiń sapasy men qaýipsizdigin baqylaý komitetiniń Ulttyq saraptama ortalyǵyna COVID-19 pandemiiasymen kúresý úshin Koreia Respýblikasynyń gýmanitarlyq kómegi tabystaldy, dep habarlaidy "Ult aqparat".
Qazaqstandaǵy Ońtústik Koreia elshiliginiń málimetine sáikes, 19 qazan kúni Almaty qalasyna gýmanitarlyq kómek túrinde 38 800 testileý júrgizýge jetetin ońtústikkoreialyq PTR-test jinaqtary jetkizilgen. Bul tester Ulttyq saraptama ortalyǵynyń Nur-Sultan, Almaty qalalaryndaǵy jáne Túrkistan, Jambyl, Almaty jáne Shyǵys Qazaqstan oblystaryndaǵy filialdaryna jiberiledi.
«QR Úkimetiniń ýaqytyly qabyldaǵan sharalary men qazaqstandyqtardyń osy sharalardy oryndaýǵa kómegi arqasynda Qazaqstan COVID-19 pandemiiasynyń birinshi tolqynyn eńsere aldy. Qazirgi ýaqytta birqatar elde COVID-19 taralý ahýaly nasharlap jatqanda, Qazaqstan pandemiianyń ekinshi tolqynyna saqtyqpen daiyndalýda. Koreia Respýblikasy úkimetiniń bul gýmanitarlyq kómegi Qazaqstandy COVID-19 pandemiiasynyń ekinshi tolqynyna daiyndaý protsesine úles qosady dep úmittenemin», - dedi Koreia Respýblikasynyń Qazaqstan Respýblikasyndaǵy Tótenshe jáne Ókiletti Elshisi Ký Hong-sok.
Óz sózinde elshi gýmanitarlyq kómek kórsetýden basqa, Koreia men Qazaqstannyń pandemiiamen kúres tájiribesin almasý, densaýlyq saqtaýdyń tsifrlyq infraqurylymyn qurý salasynda jáne ózge de baǵyttarda yntymaqtasyp otyrǵanyn atap ótti.
Sonymen birge, Ký Hong-sok Koreia Respýblikasynyń elshiligi tarapynan qarttar úii, balalar úii, mektepter men basqa da mekemeler úshin qaitarymsyz negizde jeke qorǵanys quraldaryn berý aktsiialary únemi ótip turatynyn habarlady.
«Bizdi Koreia Respýblikasymen túrli baǵyttaǵy sonyń ishinde densaýlyq saqtaý salasyndaǵy burynnan kele jatqan dostyq-áriptestik qatynastar bailanystyrady. Pandemiianyń osyndai kúrdeli kezeńindegi Korei eliniń qoldaýyn erekshe baǵalaimyz jáne Ońtústik Koreianyń joǵary basshylyǵyna COVID-19 Qazaqstan Respýblikasy aýmaǵynda taralýyna qarsy kúres úshin kórsetken gýmanitarlyq kómegi úshin alǵys bildirýge ruqsat etińiz. Bizdiń elderimiz arasyndaǵy dostyq qarym-qatynastarymyz jáne strategiialyq áriptestigimiz ózara túsinistik negizinde ǵana nyǵaiyp, dami beretinine senimdimin», - dedi QR Densaýlyq saqtaý birinshi vitse-ministri Marat Shoranov.
Koreia Respýblikasy úkimetinen kelgen gýmanitarlyq kómekten bólek, DDSU jahandyq jetkizý arnasy (WHO Global supply chain) arqyly satyp alynǵan 75 myń AQSh dollary bolatyn FFP2 standartyndaǵy qorǵanys maskalary jáne 300 myń AQSh dollary somasyndaǵy meditsinalyq jabdyqtar túrinde gýmanitarlyq kómektiń kelesi partiialary jetkiziledi.
