Ońtústik Afrika Respýblikasynyń Kvazýlý-Natal provintsiiasyndaǵy sý tasqyny kem degende 300 adamnyń ómirin qidy, dep habarlaidy QazAqparat Africa News-ke silteme jasap.
Eki kún buryn bastalǵan nóser jańbyr sońǵy 60 jylda bolmaǵan iri sý tasqynyna ákeldi. Keibir aýdandarda birneshe ailyq jaýyn mólsheri birden jaýyp, sý kóshkini júrdi.
«13 sáýirde keshkisin bizge Kvazýlý-Natal provintsiiasyndaǵy sý tasqynynan qaza tapqandardyń sany 306 adamǵa deiin jetkeni habarlandy», - deidi tabiǵi apattar saldaryn joiý jónindegi basqarmanyń baspasóz hatshysy Nonala Ndlový.
El prezidenti Siril Ramafosa Dýrban qalasynyń mańyndaǵy sý tasqyny men kóshkinnen zardap shekken eldi meken turǵyndarymen kezdesip, kómektesýge ýáde berdi. Ol bul apat klimat ózgerýiniń bir kórinisi ekenine toqtaldy.
Oqiǵa ornynda izdestirý-qutqarý jumystary jalǵasyp jatyr. Soǵan qaraǵanda, zardap shekkenderdiń sany artýy múmkin.
