QR Strategiialyq josparlaý jáne reformalar jónindegi agenttiktiń ulttyq statistika biýrosynyń basshysy Nurbolat Aidapkelov Ulttyq halyq sanaǵy dástúrli formatta qalai júrgiziletinin túsindirdi, dep habarlaidy QazAqparat.
«Sanaq suraqtaryna onlain rejimde jaýap bergender sanaqtan ótkeni týraly habarlamany kórsetedi. Interviýer turǵyn úidegi barlyq adamdar sanaqtan ótkenine kóz jetkizgennen keiin, óz ýchaskesiniń kelesi mekenjaiyna barady. Bul ýchaskeler halyq sanaǵynyń 1-30 maýsym aralyǵynda ótken birinshi kezeńi barysynda qalyptastyrylǵan bolatyn», - dedi N. Aidapkelov Ortalyq kommýnikatsiialar qyzmetinde ótken brifingte.
Aita keteiik, 1 qazannan bastap halyqty sanaqpen tolyq qamtý maqsatynda jappai aralaý kezeńi bastaldy. Ol 30 qazanǵa deiin jalǵasady.
«Qazirgi ýaqytta respýblika boiynsha sanaq personaly retinde 23 myń adam jumysqa alyndy. Olardyń ishinde 2693 nusqaýshy-baqylaýshy jáne 20 myńnan astam interviýer bar. Erekshe atap óterligi, olardyń barlyǵy 18 jastan asqan, COVID-ke qarsy vaktsina alǵan, planshet, kompiýtermen jumys istei alatyn azamattar. Barlyq interviýerlerge planshetpen jumys isteý, saýal salý júrgizý ádisteri boiynsha oqytý uiymdastyryldy. Interviýerde sanaq logotipi bar kók sharf jáne sómke bolady. Elektrondyq sanaq paraqtary bar planshet, sondai-aq, beidj-kýálik beriledi. Bul kýálikte aýmaqtyq statistika departamenti basshysynyń qolymen jáne mórimen rastalǵan interviýerdiń fotosýreti, tolyq aty-jóni bolady. Kýáliktiń joǵarǵy bóliginde tirkeý nómiri kórsetiledi. Bul nómirdi sanaq.gov.kz saitynda «interviýerdi izdeý» jolaǵyna engizýge bolady, sodan keiin saitta interviýerdiń derekteri kórsetiledi. Sondai-aq, interviýerdiń jeke basyn 1446 nómirine qońyraý shalý arqyly da tekserýge bolady», - dep túsindirdi spiker.
