Sýret: pixabay
Búgin Memleket basshysy “Onlain-platfmormalar jáne onlain-jarnama” týraly zańǵa qol qoidy. Bul týraly Aqparat ministri Darhan Qydyráli áleýmettik jelidegi paraqshasynda jazdy, dep habarlaidy «Ult aqparat».
«Barshaǵa belgili, áleýmettik jeliler búginde negizgi aqparat kózi men qoǵamdyq-saiasi baǵytty qalyptastyratyn platformaǵa ainaldy. “Qoǵam tynysynyń barometri” atanǵan mass-media salasy qarqyndy damyǵan tusta aqparattyq tehnologiialar áserimen álem kúrt ózgeriske ushyrady, kommýnikatsiianyń landshafty da tereń transformatsiiaǵa tústi. Máselen, kúni keshe ǵana Reuters Institute jariialaǵan biylǵy «Dijital jańalyqtar esebi» boiynsha, álemde áleýmettik jeli arqyly jańalyqpen tanysý 30 paiyzǵa ulǵaiǵan.
Osyǵan bailanysty Prezident 2022 jylǵy 16 naýryzdaǵy Joldaýynda media salanyń damý úrdisin eskere otyryp, BAQ týraly zańdy qaita qaraýdy tapsyrǵany belgili.
Bul oraida media qaýymdastyq jáne qoǵamnyń pikirine qulaq túrip, álemdik tendentsiialardy muqiiat zerdelep, mass media týraly zańnama men onlain platformalarǵa arnalǵan erejelerdi bólek qarastyrýdy jón sanadyq», - dep jazdy ministr.
Onyń aitýynsha, zańnyń qabyldanýy Qazaqstan Respýblikasyndaǵy onlain-platformalardyń qyzmeti úshin quqyqtyq negizder qalyptastyrady, onlain platformalar jáne onlain jarnama salasyndaǵy retteýdiń normativtik negizin konseptýaldyq turǵydan ózektendirýge múmkindik beredi.
«Oǵan qosa, Eýropalyq odaq qabyldaǵan Digital Services Act nemese tsifrlyq qyzmetter týraly zańnyń balamasy ispetti bul zań álemdik áleýmettik jelilerdiń interfeisin qazaqshalaý, infliýenserlerdiń jarnamasyn tańbalaý, zańsyz kontentti neǵurlym tiimdi moderatsiialaý máselelerin de retteidi.
Zań aiasynda kóleńkeli ekonomika úrdisin azaitý jáne onlain alaiaqtyqpen kúresý boiynsha qajetti sharalar qabyldanady. Basqasha aitqanda, oflain ómirdegi jaýapkershilik onlain álemde mindetteledi.
Jalpy qabyldanǵan zań azamattardyń quqyqtary men bostandyqtaryn tolyqqandy iske asyrý úshin onlain platformalarmen tiimdi yntymaqtastyq pen ózara is-qimyl ornatýǵa múmkindik beredi. Bul rette qazirdiń ózinde álemge áigili áleýmettik jeliler men onlain platformalar áriptestik ornatýǵa yqylasty ekendikterin tanytyp, keibiri ókilderin taǵaiyndady.
Osy oraida zańǵa bastamashy bolǵan depýtattarǵa, jalpy Májilis jáne Senat depýtattaryna, jumys tobynyń múshelerine, usynys aitqan, qoldaý bildirgen barsha belsendi azamattarǵa alǵys aitamyz.
Jańa zań el igiligine qyzmet etedi dep senemiz», - deidi Darhan Qydyráli.
