Foto: Sputnik / Stringer
Óńirde tasqyn jaǵdai kúrdeli bolyp barady. Búgin tańerteń Sergeev sý qoimasynda asyp tógilý 415 sm qurady, dep jazdy Soltústik Qazaqstan oblysynyń ákimi Ǵaýez Nurmuhambetov áleýmettik jelide, dep habarlaidy «Ult aqparat» Sputnik Qazaqstanǵa silteme jasap.
"Óńirde tasqyn jaǵdai kúrdeli bolyp barady. Búgin tańerteń Sergeev sý qoimasynda asyp tógilý 415 sm qurady. 2017 jylǵy tasqynnyń kórsetkishterinen áldeqaida asyp tústi. Sondyqtan, eldi-mekender men oblys ortalyǵyn sýdan qorǵaý úshin kúni-túni is-qimyldar jasalýda. Eń bastysy turǵyndardy qaýipsiz jerge kóshirý jáne múlikti saqtaýǵa, úlken sýdyń kele jatqany týraly der kezinde aqparat berýge kóp kóńil bólý kerek", – dep jazdy SQO ákimi Ǵaýez Nurmuhambetov.
Oblysta memleket basshysynyń tapsyrmasyna sai jumys babymen premer-ministrdiń birinshi orynbasary Roman Skliar júr. Birinshi vitse-premer tasqyn jaǵdaiyna bailanysty jinalys ótkizdi, strategiialyq mańyzy bar nysandar men bógetterdiń jaǵdaiyn tekserdi.
Qurylys jáne jol kompaniialarynyń basshylarymen kezdesip, sý tasqynyna qarsy sharalarǵa qatysýǵa úndedi. Úlken sý kelgen aýyldardyń turǵyndarymen júzdesip, memleket barlyq kómekti jasaitynyn jetkizdi.
Skliardyń tapsyrmasy boiynsha bógetterdi nyǵaitý jáne olardy uzartý, kúshter men arnaiy tehnikanyń sanyn kóbeitý, mobildi toptar qurý boiynsha jumystar atqarylýda.
