Senat Tóraǵasy Dariǵa Nazarbaeva elimizdiń ózin-ózi qamtamasyz etý jaǵdaiyna, ásirese koronavirýs indetiniń pandemiiasy kezindegi máselelerge alańdaýshylyq bildirip otyr. Senat Tóraǵasy ol týraly «Egemen Qazaqstan» gazetinde jariialanǵan maqalasynda atap kórsetti, dep habarlaidy "Ult aqparat" Senattyń baspasóz qyzmetine silteme jasap.
Joǵarǵy Palatada naýryz aiynyń basynda «Qazaqstannyń jeńil ónerkásibi: qazirgi jai-kúii jáne ónimdiligi joǵary biznestiń damý bolashaǵy» atty parlamenttik tyńdaý ótken bolatyn.
Dariǵa Nazarbaeva depýtattar sala ókilderimen birlese otyryp, negizgi problemalyq máselelerdi anyqtaýda aýqymdy jumystar atqarǵanyn jáne Qazaqstannyń jeńil ónerkásibin damytý jóninde birqatar usynystar ázirlegenin atap ótti. Degenmen, barlyq elderge demde taraǵan qaýipti dert el ekonomikasyndaǵy salalardyń rólin qaita qaraýǵa májbúr etedi. «Koronavirýs pandemiiasynyń saldary álemdik jáne otandyq ekonomikaǵa da aýyr tiiýi múmkin. Bul jaqsy emes. Salalardaǵy úirenshikti bailanystar buzyldy», - dedi Palata basshysy.
Senat Tóraǵasy daǵdarys jaǵdaiynda el qaýipsizdigine qatysty negizgi máselelerdi kótere otyryp, ekonomikanyń barlyq sektorlarynda jumyldyrý rezervteriniń bolýy qajettigin atap ótti. «Naryqqa bárin bere salýǵa bolmaidy. Ónerkásiptik saiasatty túbegeili qaita qaraý qajet. Kútpegen jaǵdailarǵa jaýap berý úshin jumyldyrý qýaty men memlekettik rezervti qalpyna keltirý – ómirlik mańyzy bar máseleler», - dedi ol. Dariǵa Nazarbaeva sonymen qatar, aimaqtar da óz erekshelikterine qarai shuǵyl jaǵdailarǵa jaýap qaitarýdyń arnaiy tetikterin qarastyrýy tiis ekenine erekshe nazar aýdardy.
Senat basshysy el ekonomikasyndaǵy daǵdarysty jaǵdailar týraly aita kelip: «Bizdiń ekonomikamyz ikemdi bolmai shyqty. Sońǵy ýaqytta pandemiia men munaiǵa bailanysty energiia qoryna suranystyń tómendeýi Qazaqstan ekonomikasy úshin buryn-sońdy bolmaǵan syn-qaterler týdyrdy. Endi barlyq institýttyń beriktigi synalady», dedi.
D.Nazarbaevanyń aitýynsha, bar resýrstardy múmkindiginshe óńdeý ónerkásibin damytýǵa jumsaý kerek, bul álbette jeńil ónerkásipke qatystybolyp otyr. «Bárinen buryn eldiń azyq-túlik qaýipsizdigin qamtamasyz etetin aýyl sharýashylyǵyna qatysty. Qiyn kezeń keldi. Biz kóp nárseden bas tarta alamyz. Biraq tamaq, kiim, aiaq kiim árqashan jetkilikti bolýy tiis», - dedi Palata Tóraǵasy.
D.Nazarbaeva sonymen qatar elimizdiń ekonomikasyndaǵy agroónerkásip sektorynyń róline erekshe toqtala kelip: «Agroónerkásip kesheni elimizdiń azyq-túlik táýelsizdigin qamtamasyz etetin jáne halyqtyń kúndelikti tutyný taýarlaryna degen negizgi qajettilikterin qanaǵattandyratyn ekonomika salalary úshin táýelsiz shikizat kózi bolýy tiis», - dedi.
Senat Tóraǵasy maqalany qorytyndylai kelip, strategiialyq sipattaǵy qujattardy qaita qaraý qajettigin atap kórsetti. «Barlyq damý baǵdarlamasyna oryn alýy múmkin daǵdarystarǵa bailanysty túzetýler engizýge tiispiz. Bul – pandemiia, klimattyń ózgerýi, dushpandyq áreketter, shikizat nemese qarjy naryqtaryndaǵy qurylymdyq quldyraýlar jáne elimiz úshin qalamaityn basqa da jaǵdailar bolýy múmkin. Alaida biz barlyǵyna daiyn bolýymyz kerek», - dedi D.Nazarbaeva.
Maqalanyń tolyq nusqasyn myna siltemeden oqi alasyzdar.
