Foto: "Báiterek"
Qanat Sharlapaev ónerkásip jáne qurylys ministri boldy, dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysynyń Jarlyǵymen Qanat Bisimbaiuly Sharlapaev Qazaqstan Respýblikasynyń Ónerkásip jáne qurylys ministri laýazymyna taǵaiyndaldy" - delingen habarlamada.
Qanat Sharlapaev 1981 jyly Saratov oblysynda dúniege kelgen.
Saratov áleýmettik-ekonomikalyq ýniversitetin (RF), Cranfield School of Management (Ulybritaniia) bitirgen.
Eńbek jolyn 2003 jyly bank sektorynda bastady.
2006-2008 jyldary "Siti" investbankiniń (Ulybritaniia, Chehiia) óńirlik keńsesiniń qarjy departamentinde, jobalardy basqarý departamentinde, operatsiialyq-tehnologiialyq departamentinde, satý basqarmasynda jumys istedi.
2008-2014 jyldary – "Siti" investbankinde (London, Ulybritaniia) aǵa taldaýshy, vitse-prezident kómekshisi, aktsiialar naryǵyndaǵy jumys jónindegi óńirlik divizionnyń vitse-prezidenti.
2014-2015 jyldary – "Siti" investbankiniń Eýropa, Taiaý Shyǵys jáne Afrika boiynsha strategiialyq josparlaý jáne taldaý óńirlik tobynyń vitse-prezidenti (London, Ulybritaniia).
2015-2017 jyldary – "Sitibank Qazaqstannyń" bas qarjy direktory, basqarma tóraǵasynyń orynbasary, aǵa vitse-prezidenti.
2017-2020 jyldary – Resei Sitibankinde Resei, Ýkraina jáne Qazaqstan boiynsha bas qarjy direktory, aǵa vitse-prezidenti.
2020 jyldan 2022 jylǵa deiin "Siti" investbankiniń (BAÁ) Afrika, Taiaý Shyǵys jáne Shyǵys Eýropanyń damýshy naryqtaryndaǵy strategiia, josparlaý jáne taldaý jónindegi óńirlik direktory qyzmetin atqardy.
2022 jylǵy aqpannan búgingi kúnge deiin "Báiterek" ulttyq basqarýshy holdingi" AQ basqarma tóraǵasy boldy.
