Muhtar Áýezov atyndaǵy Qazaq ulttyq drama teatrynyń akteri, «Qurmet» ordeniniń iegeri Úsiphan Seitimbet dúnieden ótti.
«Ol sanaly ǵumyryn Muhtar Áýezov atyndaǵy Qazaq ulttyq drama teatryna arnap, týma talanty, tabiǵi daryny arqasynda ár janrda este qalarlyq san qyrly obrazdar galereiasyn jasady. Halyq jadynda boiyna barlyq ónerdi qabystyra bilgen sheber akter retinde qaldy.
Marqumnyń otbasy men jaqyndaryna, búkil teatr ujymyna qaiǵyryp, kóńil aitamyz. Jatqan jeri jaily bolyp, jany peiishte shalyqtasyn. Artynda qalǵan urpaqtaryna uzaq ǵumyr bersin», - dep jazdy teatr.
Akter Bekjan Turys Facebook paraqshasynda Úsiphan Seitimbet týraly esteligin bólisip, áserli jazba arnady.
"Ómir atty dúriia-dúrmekten taǵy bir áriptesimiz ótti... Ajal kelse, aial bermes, adam ǵumyry shyny shólmektei ǵoi, bolymsyzdan syzat túsip, boljaýsyzdan synady…
Qairan Úseke, alpys eki tamyryńda qazaqy qan men ýaqyt rýhy jarysa oinaǵan ádildikke baǵyttaǵan órisiń oń, adaldyq pen tazalyqtyń, kisilik pen kishipeiildiktiń ónegesi ediń. Eshkimniń júregine qaiaý salmai, ózińdi qorshaǵan adamdardy aialap, únemi dostyq piǵylda júretin er-azamatqa tán mineziń qazaq jigitteriniń kelbetin kestelep turatyn edi.
Keńestik kezeńniń otarshyldyq, ámirshil-ákimshil júiesine, tuiyq saiasatyna qarsy jalańash deneńdi tosyp, elińniń azattyǵy úshin qalai kúreskenińdi bilmegenderge aiyp joq, biletinder ónerdegi jeńisteriń men jetistikterińe kóz juma qarady-aý… Qasqaiyp qaharman bolǵanyńmen jalyndaǵan jastyq shaǵyńnyń eki jylyn jeltoqsannyń yzǵarly jeline “tońdyrdyń”… Táýelsizdiktiń jarshysy bolǵan 86-nyń qysy birde - “oqiǵa”, keide “kóterilis” atalyp ádil baǵasyn ala almaǵany siiaqty seniń de ónerde óz biigiń bola tura baǵalanbai ataqsyz qalǵanyń…
Óziń eńbek etken ujymyń usynǵanymen joǵary jaqtyń óz tańdaýy basqa ma, qaidan bileiin, estilerdi keiin qaldyryp, esirikterdi alǵa ozdyrǵanda “utqanymyz” osy boldy. Eń bolmasa, “Eńbegi sińgen qairatker” ataǵyn qimady-aý… Zeinet jasyna kelgenińde ataǵy túskirdiń bala-shaǵa marqaiyp qalýy úshin de kerek ekenin jai ǵana aityp ediń… “Ataqtyń eń úlkeni Jeltoqsannyń qaharman batyry”, – degenim, anyǵynda ózińdi, osylai jubatqanym edi.
Qalai tez óte shyqty bári!?
Kóp nárse ishińde júrdi, kóp nárseńdi aita bermeitinsiń…Ónerdegi ornyń oisyrap qalatynyn qaidan bildik…
Taryqqan kóńilińe keńshilik kórsete almasam keshir, Úseke. Qý tirliktiń quly bolyp bara jatqanymyzdy beimezgil ólimińmen “eskerte” saldyń… Mynaý sumdyǵy kóp, shyndyǵy az zamanda sezimtal júrek syr berdi-aý, qabyrǵam sógildi, janym ezildi.
Osy jolǵy Táshken sapary sońǵy gastroliń boldy. Adamnyń janyna úńilgimiz kelmeidi, ólgennen keiin osylai kúńirenemiz. Jan dúnieńniń astań-kesteńin shyǵaryp jatatyn qubylmaly jáne aýmaly-tókpeli kóńil kúiińdi uqqym kelse de, uqpaǵan siiaqty boldym ba, bilmeimin ǵoi, júrekke salmaq salyp aiyqpas muń syilap ketkeniń aqiqat. Qosh, Úseke…", - dep jazdy akter.
Aita keteiik, Úsiphan Seitimbet 1960 jyly Keles aýdany, Igilik aýylynda dúniege keldi. 1979 jyly Respýblikalyq Estrada-óner stýdiiasyn bitirip, Almaty oblystyq filarmoniiasyna jumysqa qabyldandy. 1983 jyly Júrgenov atyndaǵy Teatr jáne kórkemsýret institýtyna oqýǵa tústi. Jeltoqsan oqiǵasy kezinde batyrlyq pen patriotizm úlgisin kórsetip, jastar qarsylyǵyn uiymdastyrǵany úshin 1987 jyly eki jylǵa sottalyp, 1989 jyly bostandyqqa shyqty. Osy jyly institýttaǵy oqýyn qaita jalǵastyryp, támamdady. 1990 jyly Músirepov atyndaǵy Jasóspirimder men balalar teatrynyń akterlik quramyna jumysqa qabyldandy. 1999 jyldan beri M. Áýezov atyndaǵy Qazaq ulttyq drama teatrynda akter bolyp qyzmet atqardy.
