Aqtóbe oblysynyń ákimi jol jóndeý josparymen tanysty, dep habarlaidy "Ult aqparat" oblys ákiminiń baspasóz qyzmetine silteme jasap.
Óńir basshysy Ońdasyn Orazalin oblystyq jolaýshylar kóligi jáne avtomobil joldary basqarmasynyń basshysy Málimbet Ibrashevtiń esebin tyńdady. 2020 jyly Aqtóbe qalasyndaǵy Bókenbai batyr kóshesinde ortasha jóndeý jumystary júrgizilip, Elek ózeni arqyly ótetin kópir eki esegi keńeietini belgili boldy. Bul joldardyń jobalyq-smetalyq qujaty ázirlenedi.
«Joldardyń jai-kúiinen tolyq habardarmyn. Óńirde jol máselesi birinshi kezektegi problema bolyp otyr. Tegis joldarǵa qol jetkizý úshin jan-jaqty ári júieli jumys atqarýǵa kiristik. Túitkildi másele birtindep óz sheshimin tabaryna senimdimin», - dep atap ótti Ońdasyn Orazalin.
Keiin óńir basshysy «Arlan» sport kesheniniń qurylysymen tanysty. Munda kúnine 400 adamnyń sportpen shuǵyldanýyna tolyq múmkindik bar. . Shaǵyn fýtbol, voleibol, basketbol, taekvando, dziýdo, bi zaldary, bassein jumys jasaidy.Ońdasyn Orazalin dene shynyqtyrý jáne sport basqarmasynyń basshysy Evgenii Goncharovqa kópshilik arasynda jappai sportpen shuǵyldaný nasihatyn kúsheitip, balalardy sportqa beiimdeýdi tapsyrdy.
Aimaq basshysy oblystyq tilderdi damytý basqarmasy tilderdi oqytý ortalyǵynyń jumysymen de tanysty. Segiz mýltimediialyq oqý kabinetimen jabdyqtalǵan mekemeniń Hromtaý, Mártók, Qarǵaly, Alǵa, Qobda Muǵaljar aýdandarynda bólimderi jumys jasaidy. Ortalyq basshysy Klara Serǵazinanyń aitýynsha, jyl basynan beri memlekettik tildi 1445 azamat oqysa, aǵylshyn tilin 187 adam meńgergen. Sondai-aq, latyn grafikasyna kóshý jumystary úshin 27 087 azamattyń qatysýymen 398 aqparattyq-túsindirme jumystary júrgizilgen.
«Til úirenýge qushtar azamattarǵa neǵurlym jeńil, uǵynyqty ádisteme qoldanǵan durys. Keide durys aýdarylmaǵan terminder men oqytýshynyń biliksizdigi azamattardyń qyzyǵýshylyǵyn joǵaltyp jatady», - dedi óńir basshysy.
Budan soń oblys ákimi «Qonys» sport kesheninde «Aqtóbe» basketbol komandasymen, komanda basshysy Almat Kenjeǵulovpen jáne komandanyń bas jattyqtyrýshysy Arsen Teleýovpen kezdesti.
