foto: tvoe-avto.com
Qazaqstanda shetelde tirkelgen oń jaq rýldi avtokólikterdi birjolǵy zańdastyrýǵa ruqsat beriledi. Bul týraly búgin Senattyń jalpy otyrysynda Ishki ister ministrligi Ákimshilik politsiia komiteti tóraǵasynyń mindetin atqarýshy Qaisar Sultanbaev aitty, dep habarlaidy QazAqparat.
Qaisar Sultanbaev Prezidenttiń memlekettik tirkeýden ótpegen sheteldik avtokólikterdi birjolǵy zańdastyrý jónindegi tapsyrmasy aiasynda tiisti jumystar júrip jatqanyn málim etti. Osy oraida, «Qazaqstan Respýblikasynyń keibir zańnamalyq aktilerine Memleket basshysynyń jekelegen tapsyrmalaryn iske asyrý máseleleri boiynsha ózgerister men tolyqtyrýlar engizý týraly» zań jobasynda tiisti norma qamtylǵan.
«Osy zań jobasyna biz taiaýda ǵana usynys engizdik. Oń rýldi kólikter birjolǵy zańdastyrýǵa engiziledi. Búginde Qazaqstanda mundai 20 myńǵa jýyq kólik bar. Bul usynys engizilip, komitette qoldaý tapty. Másele sheshildi», - dedi IIM ókili.
Jalpy, búgingi kezde Qazaqstan Respýblikasynda zańdastyrýǵa jatatyn avtokólik sany 300 myńnan asady.
Eske sala keteiik, 2007 jyldan beri rýli oń jaqtaǵy kólikterdi tirkeýge zańnama boiynsha tyiym salynǵan.
Budan buryn habarlanǵandai, biyl 1 qyrkúiektegi Joldaýynda Memleket basshysy Qasym-Jomart Toqaev 2022 jylǵy 1 qyrkúiekke deiin elge ákelingen avtokólikterge qatysty ahýaldy retteý kerek ekenin aitty.
«Olardy zańdastyrý maqsatynda ýtilizatsiia jáne alǵashqy tirkeý úshin tólenetin qarjy kólemin 200-250 myń teńgeden asyrmai, bárine birdei jáne bir rettik alym alýdy usynamyn», - dedi Prezident.
