Jetisai, Maqtaral, Keles aýdandarynyń turǵyndarymen kezdesken oblys ákimi Ómirzaq Shókeev olarmen birge birqatar ózekti máselelerdi talqylady, dep habarlaidy "Ult aqparat" óńir basshysynyń baspasóz qyzmetine silteme jasap.
Úsh aýdan azamattary men ákimderi bas qosqan jiynda jaiylym máselesine qatysty oilar ortaǵa salyndy. Qazirgi ýaqytta, maldyń kóbi qystaq pen jailaýdan góri aýyl mańynda jaiylady. Sondyqtan ol jerlerdiń tabiǵi ónimdiligi jyl saiyn tómendep keledi. Mal basynyń artýy da jerdiń tarlyq etýine ákelip soǵýda. Onyń ústine kóp jerler jeke qolda. Máseleni retke keltirý jumystary Túrkistan oblysynda úsh jyldan beri júrgizilip keledi. Úsh aýdan azamattarymen júzdesken oblys ákimi jergilikti bilik pen jaýapty tulǵalarǵa jaiylymdyq jer máselesin retteýdi júktedi.
Oblys ákimi Ómirzaq Shókeev bir alqaptan 2-3 ónim alý boiynsha «Sabyr» sharýa qojalyǵynyń atqaryp jatqan jumystarymen tanysyp, jumysshylarmen kezdesti. Qyryqqabat egip, alǵashqy ónim alýǵa daiyndalyp júrgen diqandar bul tásildiń tiimdiliginiń qyr - syrymen bólisti. Birinshi ónimdi jiyp alǵan soń olar qarbyz egýge kóshedi. Tiimdiligin dáleldegen tásilge júgingender, jylyna 1 ga jerden 8 mln teńgege deiin paida tabady.
