Túrkistan oblysyna eki aiǵa qajetti dári-dármekter bir aptanyń ishinde jetkiziledi. Bul týraly oblys ákimi Ómirzaq Shókeev aimaqtaǵy qalyptasqan epidemiologiialyq jaǵdai týraly uiymdastyrylǵan brifing barysynda aityp ótti, dep habarlaidy "Ult aqparat".
Óńir basshysynyń aitýynsha, qazir oblystaǵy emdeý mekemelerinde dári tapshylyǵy joq. Barlyq emhanalar men aýrýhanalar dárimen tolyqqandy qamtamasyz etilgen. Biraq, keiingi eki aptadaǵy jekemenshik dárihanalardaǵy jaǵdai jergilikti bilikti alańdatyp otyr.
«Óńirde shilde men tamyz ailaryna dep bólingen dári-dármekter dárihanalarda eki-úsh kúnde satylyp ketti. Halyq jappai satyp alyp ketti. Sondyqtan biz úkimetke, arnaiy komissiiaǵa shyǵyp, tez shuǵyl arada sondai sharalardy qabyldaýdy uiǵardyq. Jalpy oblystyq biýdjetten 500 mln teńgeni bólip, Ózbekstan úkimetimen bailanysqa shyqtyq. Kórshi elden arnaiy bir tizimmen dárilerdi ákelýge kelistik. Búgin oblysqa eki júk kóligimen dári jetkizildi. Halyqqa eń kerekti degen antibakterialdy, antikogýliantty dáriler kelip jatyr. Ekinshi, Densaýlyq saqtaý ministrliginiń yqpalymen Túrik elimen bailanysyp, ol jaqtan antibiotikter men basqa da sáli kúrdeli dárilerdiń bári jetkizilmek. Sondyqtan eki ailyq bizge kerekti dáriler osy bir aptanyń ishinde oblysqa tasymaldanady. Sóitip barlyq emdeý mekemelerine taratylatyn bolady. Biz qabyldap otyrǵan shuǵyl sharalardyń arqasynda kóptegen máseleler sheshimin tappaq. Biz ol dárilerdi dárihanalar arqyly shekteýli baǵamen satýymyz kerek. Jáne bir qolǵa bosatylatyn normany belgilep qoiamyz. Óitkeni kóp jaǵdaida bizdiń turǵyndar dári-dármekterdi kerek bolmasa da alyp qoia beretin bolǵan»,- dedi Ómirzaq Shókeev.
