Koronavirýs kesirinen 1 qańtarda álem boiynsha myńdaǵan áýe reisi kestede kórsetilgen ýaqytynda ushpai, áýejaida bógelýge májbúr boldy. COVID-19 áýe kompaniialary qyzmetkerlerine de juǵyp, meiram kúnderi saparǵa shyǵýdy josparlaǵan jolaýshylarǵa qyzmet kórsetýge adam jetispegen.
Flightaware.com saity málimetinshe, 1 qańtarda tús kezinde 4600-den astam áýe reisi (jartysynan astamy AQSh-ta) joldan qalǵan, dep habarlaidy Azattyq.
Rojdestvo merekesi kezinde qyzmetkerlerine "Omikron" shtamy juǵyp, kibirtiktep qalǵan áýe kompaniialarynyń jumysyn taǵy da qyrsyq shaldy.
Densaýlyq saqtaý salasy ókilderi aýrý buryn-sońdy bolmaǵan qarqynmen tez tarap jatqanyn aitady.
Djon Hopkins ýniversitetiniń dereginshe, AQSh-ta ótken aptada bir kúnde aýrý juqtyrǵandar kórsetkishi rekordqa jetken.
31 jeltoqsanda Frantsiiada koronavirýs juqtyrǵan 232200 adam anyqtalǵan. Elde úshinshi kún qatarynan kún saiyn 200 myńnan astam adamnan virýs anyqtalyp jatyr.
Ulybritaniia bir kúnde 189 846 adamnyń virýs juqtyrǵany anyqtalǵan — bul da rekordty kórsetkish.
Jańa jyldyń basynda Portýgaliia men Avstraliiada da COVID-19 kórsetkishi buryn-sońdy bolmaǵan deńgeige jetken.
"Omikron" shynymen túgeldei jailap aldy" dedi CNN telearnasy suhbat bergen Braýn ýniverstitetiniń meditsina professory.
Qazaqstan biligi ázirge elde "Omikron" juqtyrǵan naýqas tirkelgen joq deidi, biraq shtamm anyqtalǵan jaǵdaida qandai shara qoldanylatynyn habarlaǵan. Atap aitqanda, "Omikron" kelse, 5 qańtardan bastap bankter, "Qazposhta", halyqqa qyzmet kórsetý ortalyǵy, sport-saýyqtyrý, bassein jáne basqa oryndarǵa tek Ashyq qosymshasynda jasyl tústi statýsy bar adamdar ǵana kire alady. Ondai statýs koronavirýsqa qarsy vaktsina alǵan, sonymen birge PTR test tapsyryp, onyń qorytyndysy teris bolyp shyqqan (olardyń statýsy bir apta ǵana jaramdy), koronavirýs juǵyp aýyryp, jazylǵan adamdarǵa (dertten jazylǵan soń alynǵan alǵashqy PTR testiden keiin úsh ai jaramdy) beriledi.
Resmi málimet boiynsha, ótken táýlikte Qazaqstanda 457 adamnan koronavirýs anyqtalǵan. Bul 31 jeltoqsandaǵy kórsetkishten on adamǵa kóp.
