Foto: primeminister.kz
15 shildede Úkimette 2025 jylǵy qańtar-maýsym ailaryndaǵy áleýmettik-ekonomikalyq damý jáne respýblikalyq biýdjettiń atqarylý qorytyndylary qaraldy. Onda osy jyldyń qańtar-maýsym ailarynyń qorytyndysy boiynsha ekonomikanyń ósýi 6,2% - ǵa jetkeni aityldy. Alǵashqy bes aimen salystyrǵanda ekonomikanyń ósýi 0,2% - ǵa ulǵaiyp, bul ótken jyldyń sáikes kezeńimen salystyrǵanda joǵary jáne sońǵy 12 jyldaǵy JIÓ ósýiniń eń joǵary kórsetkishi bolyp shyqty. Osy oraida Ult.kz tilshisi QR Premer-ministri Oljas Bektenov bul kórsetkish halyqtyń ál-aýqatyna naqty qalai áser etip jatqanyn surady.
«Jalpy ishki ónimniń kólemi ósip jatyr. 6,2 paiyz boldy. Makroekonomikalyq kórsetkishterdiń naqty adamǵa oń árseri bolýy úshin biz osyndai turaqty, qarqyndy ósimdi birneshe jyldar boiy qamtamasyz etip otyrýymyz kerek, sonda árbir qazaqstanadyq onyń paidasyn kóredi. Óitkeni jańa kásiporyndar men jańa jumys oryndary bolady. Ony men birneshe ret aityp óttim. Sonda halyqtyń ál aýqaty ósetin bolady. Biz osy maqsatqa qol jetkizý úshin barlyq kúsh-jigerimizdi salyp jatyrmyz», ‒ dedi Oljas Bektenov.
Tilshimizdiń kelesi suraǵy kedeilik deńgeii naqty qandai kórsetkishpen baǵalanatyny týraly boldy. Sebebi este bolsa, Qazaqstanda keiingi 10 jylda kedeilik deńgeii 2,7 paiyzdan 5,1 paiyzǵa ósti degen aqparatty depýtat Ashat Rahymjanov aitqan edi, alaida Oljas Bektenov elde kedei adamdardyń sany jyldan jylǵa kerisinshe azaiǵanyn aitty.
«Men sizben kelispeimin. Kedeilik deńgeii Qazaqstanda jyldan jylǵa tómendep bara jatyr. Ol statistikalyq derekter tek Qazaqstanda shyǵarylǵan derekter emes, jalpy halyqaralyq uiymdar beretin derekterge súiensek, ol jaǵdai sondai bolyp tur. Árine birinshi suraǵyńyzǵa jaýap bergen kezde men aittym, biz birneshe jyl osyndai qarqynmen, iaǵni 5-6 paiyzben ósetin bolsaq, ekonomikamyzdyń kólemi ósedi, jalaqylardyń deńgeii kóteriledi, kedeiliktiń deńgeii túsedi. Olar bir birine bailanysty máseleler. Sondyqtan naqty sektor Roman Vasilevich (Skliar, red.) jaýap beretin, Ermek Bedelbaiuly (Kósherbaev, red.) áleýmettik saiasatqa jaýap beretin tulǵalar bar, biz bárimiz barmyz. Úkimettiń ishinde úilesimdi jumys ótkizilýi tiis. Biz osy baǵytta jumys jasap jatyrmyz. Ekonomikanyń damýy naqty sektoryn damytý árine áleýmettik salanyń damýy men bailanysty», ‒ dedi Premer-ministr.
Ait keteiik, Áleýmettik kodekske sáikes 2025 jylǵy 1 qańtardan bastap AÁK taǵaiyndaý úshin kedeilik shegi halyqtyń mediandyq kirisinen aiqyndalady.
