Foto: primeminister.kz
Premer-Ministr Oljas Bektenov Almaty oblysyna jumys sapary aiasynda Memleket basshysy tapsyrmalarynyń oryndalý barysyn tekserdi. «Jaily mektep» ulttyq jobasyn iske asyrý aiasynda Alataý qalasyndaǵy 900 oryndyq jańa mektep qurylysynyń jumys qarqynymen tanysty.
Jyl sońyna deiin 3 myń m2 alańda ornalasqan jańa bilim berý nysanyn paidalanýǵa berý josparlanyp otyr. Búginde nysannyń irgetasy men monolitti qańqasyn ornatý jumystary aiaqtalǵan. Mektep qajetti injenerlik-kommýnikatsiialyq infraqurylymmen qamtamasyz etilip, qurylys jáne bilim berý salasyndaǵy sony tehnologiialarmen jabdyqtalady.
Úkimet basshysy qurylys jumystaryn belgilengen merzimde sapaly júrgizýdiń mańyzdylyǵyn basa aitty.
Elimizde 2024-2025 jyldar aralyǵynda Ulttyq joba boiynsha barlyǵy 369 mektep ashý josparlanyp otyr. Atap aitqanda, Almaty oblysynda 2024-2025 jyldary 53 jaily mektep salynady. Biyl 600-den 1500 orynǵa deiingi syiymdylyǵy ár túrli 26 jaily mektepti paidalanýǵa berý josparlanýda.
Ulttyq jobanyń sharttaryna sáikes, barlyq jaily mektepter oqýshylar men pedagogter úshin joǵary qaýipsizdik sharalaryn, tiisti infraqurylymdy jáne qolaily jaǵdaidy qamtamasyz ete otyryp, biryńǵai standartqa sai salynatyn bolady.
Premer-Ministr jańa jobalar ázirleýdi jáne memlekettik saraptamadan ótkizýdi jedeldetýdi jáne salynyp jatqan ǵimarattardy paidalanýǵa berý merzimderiniń saqtalýyn qatań baqylaýda ustaýdy tapsyrdy.
«Bul – Prezidenttiń megajobasy. Onyń sapaly ári ýaqytynda iske asyrylýyn qatań baqylaýǵa alý qajet. Jaily mektepterdiń qurylysy balalarymyzdyń sapaly bilim alýyna barlyq jaǵdai jasaýǵa baǵyttalǵan. Úkimet aldynda 2025 jyldyń sońyna qarai 740 myń jańa oqýshy ornymen qamtamasyz etý mindeti tur. Qurylys jumystaryn joǵary qarqynmen júrgizý qajet», — dep atap ótti Oljas Bektenov.
