Phenchhan Olimpiadasynyń ashylý saltanatynda Qazaqstan týyn short-trekshi Abzal Ájiǵaliev ustap shyǵýy múmkin, dep habarlaidy "Ult aqparat" Baq.kz agenttigine silteme jasap.
Biyl 9-25 aqpan aralyǵynda Ońtústik Koreianyń Phenchhan qalasynda XXIII qysqy Olimpiada oiyndary ótedi. Jyldyń aitýly dodasynda 2 myńdai sportshy baǵyn synamaq. Al qazaqstandyq sportshylar Olimpiada joldamasyn alý úshin litsenziialyq jarystarǵa qatysyp jatyr.
«Bizdiń sportshylar 9 sport túrinen 50-den astam litsenziia alýdy josparlap otyr. Qazirgi tańda sporttyń 4 túrinen 33 litsenziia: biatlonnan - 10, short-trekten - 10, mánerlep syrǵanaýdan - 3 jáne konkimen júgirýden 10 joldama bar», - dedi QR Mádeniet jáne sport ministrligi Sport jáne dene shynyqtyrý isteri komiteti tóraǵasynyń orynbasary Serik Jarasbaev.
Onyń aitýynsha qazaqstandyq atletter shańǵymen tramplinnen sekirý, shańǵy qossaiysy jáne fristaildan da joldama alýǵa úmitti.
«Fristail-mogýl sportynan Dmitrii Reihard, Iýliia Galysheva, sonymen birge biatlonshylarymyz jaqsy nátije kórsetip júr. Short-trekten ulttyq qurama sportshylaryna erekshe toqtalǵym keledi. Olar álem Kýbogynyń barlyq litsenziialyq kezeńderine qatysyp, 10 joldama jeńip aldy. Short-trekshi Abzal Ájiǵaliev Qazaqstan týyn ustap shyǵady dep josparlanyp otyr. Onyń Qazaqstan quramasy sapynda jarystarǵa qatysyp kele jatqanyna birneshe jyl boldy. Olimpiada oiyndarynda týdy ustap shyǵýǵa laiyqty kandidat ekenine senimdimiz», - dedi ol.
Abzal Ájiǵaliev 2016 jyly Solt-Leik Sitide ótken short-trekten álem Kýbogynyń ekinshi kezeńinde altyn medal ielendi.
