Tokio Olimpiadasynyń qola júldegeri Eldos Smetov elge oraldy. Ony áýejaidan jaqyndary men jankúierleri ystyq yqylaspen qarsy alyp, dziýdoshyǵa sý jańa temirtulpardy syiǵa tartty, dep habarlaidy "Ult aqparat" «Oian, Qazaqstan!» baǵdarlamasyna silteme jasap.
Eldos Smetovty kútip alý saltanatyna qazaq estradasynyń ánshileri, aitysker aqyndar jáne Olimpiada júldegeriniń alǵashqy jattyqtyrýshysy da keldi. Shákirtiniń jetistigine shattanǵan jattyqtyrýshy qýanyshtan kózine jas aldy.
«Mine, naǵyz chempion. Meniń alǵashqy jattyqtyrýshym. Kishkentai kezimnen meni óz balasyndai kórip, alaqanyna salyp ósirgen meniń bapkerim», - dedi Eldos Smetov.
El mereiin asqaqtatqan sportshyny kútip alý saltanatynda shashý shashylyp, oǵan áýejai mańynda jańa kóliktiń kilti tabystaldy. Kólikti Eldos Smetovke kásipker Rýslan Berdenov syilady.
«Olimpiada óte keremet ótti. Zaldyń bos bolǵany biz úshin yńǵaiysyz boldy. Eń qiyn bolǵan beldesý ol – aqtyq saiysqa joldama beriletin finaldyq beldesý. Osylai buiyryp tur eken. Osynyń ózine qýanyshtymyn. Meniń elim, jerim, halqym úshinshi oryndy birinshi oryn retinde qabyldap, meni Olimpiada chempiony retinde kútip aldy», - dedi eki dúrkin Olimpiada júldegeri.
Sportshyny kútip alǵandardyń arasynda Muhamedjan Tazabekov te bar.
"Túndeletip aeroporttan ata-anasy, baýyrlary, dostary, jýrnalister, qaýmalaǵan qalyń jankúier elmen birge qurmettep, kútip aldyq. Uzaq jyldar eńsesi ezilgen, óz taǵdyryna ózi sheshim qabyldai almaǵan biz sekildi púshaiman elge ulttyq rýhty oiatatyn, namysty dýyldatatyn, kók týdy jelbiretetin árbir ul men qyz qymbat. Eldos solardyń biregeii!", - dep jazdy Tazabekov.
Tokioda Olimpiada oiyndary 23 shilde men 8 tamyz aralyǵynda ótedi.
Qazir Qazaqstannyń qorjynynda úsh qola medal bar. 24 shildede dziýdoshy Eldos Smetov jartylai finalda Niderlandy ókili Tornike Chakadýany jeńip, Qazaqstanǵa qola medal ákeldi. Ekeýin aýyr atletter – Igor Son men Zýlfiia Chinshanlo alyp berdi.
