Búgin ánshi Dimash Qudaibergen I am a Singer baiqaýynyń finalynda óner kórsetedi. Final Astana ýaqytymen saǵat 22.00-de "Habar" telearnasynan tikelei efirde taratylady. Ánshiniń áigili Maikl Djeksonnyń oryndaýyndaǵy ándi aitady, alaida naqty qai ánin aitatyny ázirshe belgisiz, joba avtorlary muny qupiia qaldyryp otyr eken. Baiqaý aldynda ánshiniń PR-direktory ári jaqyn dosy Alpamys Sharimovpen suhbattasý múmkin boldy.
- Finalǵa sanaýly saǵattar qaldy. Dimashtyń kóńil-kúii qalai?
- Finalǵa az ýaqyt qaldy, sanaýly saǵattardan keiin "Men ánshimin" jobasynyń jeńimpazy anyqtalady. Keshe bizde basty daiyndyq ótti. Daiyndyq jaman emes, árine, ýaqyt az, biraq barlyq qatysýshyǵa ýaqyt teń beriletindikten, bul jerde ýaqyttyń azdyǵyna bailanysty eshteńe aita almaimyz. Ózderińiz biletindei, Dimash osy baiqaýda áigili Maikl Djeksonnyń ánin shyrqaidy, birge óner kórsetetin ánshisi - Laýre Shang. Ol osy finalda Dimashqa baryn salyp, 100 paiyz qoldaý kórsetýge daiyn ekenin aityp otyr. Daiyndyqtary óte joǵary. Keshe dástúrli qyzyl kilemnen júrip ótý rásimi boldy. Dimashtyń kóptegen jankúierleri kelip, baiqaýaldy tilekterin aityp, qoldaý kórsetti.
- Dimash Qudaibergen árbir án oryndaýynda erekshelikti baiqatady. Árbir áninde janynyń tebirengenin, sezimin kórsetedi. Al búgin ánshi kórermendi nesimen tańǵaldyrady?
- Dimash árbir sahnaǵa shyqqanda ánniń qurylymyn ózi oilap tabady. Árbir ánde óziniń aitatyn oiy bolady. Búgingi ónerinde de solai. Bul oryndaityn nómirin qaraǵanda halyq Dimashtyń aitatyn oiyn túsinip qarasa eken deimiz. Ándi jai ǵana qaramai, qiialmen qarasyn. Sebebi bul jai ǵana oryndalatyn án emes, Dimash osy arqyly halyqqa, adamzatqa oiyn aitqysy keledi. Al nendei oi aitatynyn biz qupiia qaldyraiyq...
- Jankúierler kim jeńedi dep esepteidi?
- Árine, ár jankúier óz ánshisi jeńedi dep oilaidy. Árkimniń óz favoriti bar. Mysaly bizdiń Dears Dimashtyń jeńetinine kámil senimdi. Tipti olar bul baiqaýdyń qorytyndysy shyqpai jatyp, jeńisti Dimashqa berip qoiǵan.
Dimash Qudaibergen men Laýre Shang
- Final ótkennen keiin ánshi birden Qazaqstanǵa qaita ma? Sebebi qoǵamda "Dimash Qytaida kóp jetistikke jete alady, sol jaqta qalyp, shyǵarmashylyqpen ainalysqany jón" degen siiaqty pikirler bar.
- Osy Qytai eline kele jatqanda Dimash maǵan "Men qazaq tilinde án shyrqasam, qazaqtyń dombyrasyn tartsam, qazaqtyń kiimin, ulttyq oiýyn sahnaǵa alyp shyǵyp, kórsetsem" degen bolatyn. Onyń maqsaty osy boldy. Qazir oilasam, rasynda da Dimashtyń maqsattary oryndalyp jatyr. Ol - qazaqtyń balasy, ulty qazaq, biraq ol álemniń ánshisi. Ol Maikl Djekson siiaqty álemniń ánshisi dep oilaimyn. Ol qazaq ultynyń mádenietin, bolmysyn bar álemge jar salýǵa daiyn ánshi. Desek te, menińshe, mundai ánshilerdiń turaqty bir mekeni bolmaidy. Árine, týǵan jeri jáne turatyn úii Qazaqstan bolady, biraq dál Dimash siiaqty, Maikl Djekson siiaqty ánshiler álem úshin jaralǵan adamdar. Olardyń úlken missiiasy bar. Olar jer júzinde án aitýǵa jaralǵan ánshiler.
Qazaq ulttyq óner ýniversitetiniń rektory Aiman Musaxodjaeva qoldaý kórsetý úshin Qytaiǵa bardy.
- Jaqynda Dimash Qudaibergen Qytai basylymdaryna bergen suhbatynda "Men jeńiske jetken adammyn" dep málimdedi. Osyǵan qatysty kóptegen jankúierler Dimash Qudaibergen bul shoýda jeńiske jetedi dep boljady. Biraq "Finalda qanshasynshy oryn alsa da, Dimash úshin mundai jetistik jeńispen para-par" degender de boldy.
- Rasynda da, Dimashtyń jeńisi bul shoýdyń qorytyndysyna bailanysty emes, Dimashtyń jeńiske jettim dep aitqany - qazaq ánin shyrqaǵany. Dimashtyń jeńiske jettim degeni - milliondaǵan jankúieriniń bolýy. Onyń dálelin ózderińiz kórip jatyrsyzdar, barlyq qytailyq án sherýlerinde Dimashtyń ánderi TOP-1 dárejesinde tur. Tipti alǵashqy úsh oryndy ánshimizdiń úsh áni qatar alyp tur. Aziianyń tanymal ánderinde óziniń shyǵarǵan "Umytylmas kún" áni birinshi orynda tursa, saýndtregi ekinshi orynda tur. Dimashtyń osy jetken jetistikteri, onyń halyqaralyq deńgeidegi ánshi atanýy, Aziiadaǵy eń tanymal ánshi atanýy - jeńiske jetkeni dep oilaimyz. Búgingi qorytyndynyń qalai bolaryn bilmeimiz, biraq túsingen adamǵa Dimash jeńiske jetip qoidy. Búgingi baiqaýda jeńiske jetken ánshige "Patsha ánshi" degen ataq beriledi. Bul ataqty negizinen Qytaida eńbegi sińgen, úlken ártister alyp otyrǵan. Buǵan deiingi maýsymdarda baiqaýǵa jas ánshini qatystyrý degen múldem bolmaǵan. Biraq dál osy baiqaýdyń sózsiz favoriti Dimash. Osy jerde aita ketetin bir jáit, álemniń kóptegen elderinen, Amerikadan, Eýropadan, Ońtústik Afrikadan Hunan TV arnasynyń rejisserine Dimashty osy baiqaýǵa qatystyrǵany úshin alǵys hattar kóptep túsip jatyr. Men tipti, sizderge, Tengrinews.kz saityna sol hattardy joldai alamyn. Sonda Dimash bul jobany álemge tanytýǵa, al jobanyń óz kezeginde Dimashty ataqty etýge óte úlken yqpalyn tigizdi dep oilaimyn.
Dimash Qudaibergen men Laýre Shang. Daiyndyq barysy
- Baiqaýdyń birinshi kúninen beri ánshiniń qasynda júrgendikten, siz kópshilikke qaraǵanda artyq bilesiz. Sizdińshe, Dimashtyń bul shoýda jeńimpaz atanýyna múmkindigi qanshalyqty? Qansha paiyzǵa senimdisiz?
- Al óz basym dosymnyń jeńgenin qalaimyn. Baiqaýdyń birinshi kúninen bastap, qasynda júrgendikten, men úshin dosymnyń jeńiske jetkeni men úshin úlken mártebe bolady. Onyń jeńisine jáne jaqsy óner kórsetetinine senimdimin. Men dosyma árqashan da 100 paiyzǵa senimdimin. Osy joly da keshegi daiyndyǵyn kórgennen keiin senimim arta tústi. Bir qyzyq jaǵdaidy aita keteiin. Ár sahnaǵa shyǵar sátinde men Dimashqa sahnanyń artynda qoldaý bildirip, jigerlendiremin. Sosyn ol sahnaǵa shyǵady, al men kórermender jaqqa baramyn. Sol kezde jańa ǵana qoldaý kórsetip, jigerlendirgen Dimashym múldem basqa adam, men tipti tanymai qalamyn. Dimash sahnada ózgerip ketetin adam siiaqty. Esterińizde bolsa, "Daididaý" ánin shyrqaǵan kezi - Qazaqstannan kelgen dos jigitteri, Óner akademiiasynyń ónerpazdary kelip, súiemeldegen kezinde kún uzaq bolyp, sharshaǵandaryn aityp edi. Sol sharshap otyrǵan jigitter Dimash sahnaǵa shyǵyp kele jatqanda onyń múldem bólek adam bolyp kóringenin aitty. Ortaǵa shyǵyp kelip, eki qanat bolyp otyrǵandarynda, Dimash basyn izep eki jaǵyna qaraǵan sátinde jigitter ústimiz titirkenip ketti deidi. Al osydan keiin áýen bastalǵanda kózimizden jas qalai shyǵyp ketkenin bilmei de qaldyq dep, áńgimelep bergen edi ónerpaz jigitter.
Dimash Qudaibergen men Laýre Shang. Daiyndyq barysy
- Ánshiniń ónerin zalda otyryp tamashalaǵan bir basqa da, teleekrannan kórgen bir basqa. Teledidar men monitordan kórip otyrǵan halyqqa baiqaýdan qandai sátter jasyryn qalady?
- Árine, teleekrannan kórip otyrǵan adamdarǵa búgin qandai oryn alsa da, synai salý ońai. Onyń baiqaýdyń 14 kezeńine shyǵýyn 14 ret boksta judyryqtasqanymen salystyrar edim. Judyryqtasqanda adamnyń fizikalyq turǵyda, syrty zaqymdalatyn bolsa, oǵan qaita qalpyna kelýine 6-7 ai qajet bolady. Al bul jerde Dimash apta saiyn "ringke" shyǵady. Dimash apta saiyn soqqy alady. Qanshama qarsylasy aýysty. Eń birinshi synnan tek úsh adam qaldy - Lion, Sendi Lem jáne Dimash. Alǵashqy ekeýi adaptatsiia da kórgen joq, olarǵa bul úirenshikti orta. Sondyqtan bul jerde osynshama ýaqyt úiin saǵyna júrip, osyndai óner kórsetken adamǵa Qazaqstandaǵy jerlesteri synaýdan góri, qoldaý kórsetýi kerek dep oilaimyn. Dimash Qudaibergen sahnada ákesimen
Suhbattasqan Ardaq Qultai, kaz.tengrinews.kz
