Foto: instagram.com/bagdatmussin
Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin Instagram paraqshasynda Túrkiiadaǵy jer silkinisinen qaza tapqan qazaqstandyq Mirbolat (Mirýs) Qurmashev týraly jazba jariialady, - dep habarlaidy "Ult aqparat".
"Sońǵy úmit oty sóndi. Sengim kelmeidi… Sońyna deiin úmittenip edik. Alaida Mirýs baýyrymyzdan aiyrylyp qaldyq…
Mirýs ekeýimiz kýrstas boldyq. Ol óte kreativti edi, aýqymdy dúnieler jasaǵysy keletin, tartymdylyǵynyń arqasynda adamdardy uiymdastyra alatyn.
Dinge berik adam edi. Maǵjan Astana Habty qurý boiynsha alǵashqy qadamdaryn bastaǵanda, ol kóp kómek etti, tegin, eshqandai kelisimsiz. Qolynan kelgenin istep, Qazaqstannyń IT-salasyn damytýǵa úlesi men kómegin qosty", - dep jazdy ministr.
Mýsinniń aitýynsha, Qazaqstanda onyń birneshe biznes bastamalary bolǵan. 2020 jyly memlekettiń qatysýymen bir-eki jobany iske asyrǵysy kelgen.
"Biraq Memleket basshysy meni ministr etip taǵaiyndaǵan kezde ol jobalardan óz erkimen bas tartty. "Aramyzda túsinispeýshilik týdyratyn jaǵdailardy boldyrmaý úshin men ideialarymdy shet elde júzege asyramyn", dedi ol.
Mirýs - jihankez, biraz jerde boldy, biraq turaqtaý úshin Túrkiiany tańdap, sońǵy eki jyl negizinen sol jaqta turyp jatty.
Prezidenttiń Ankaraǵa resmi saparynyń aldyndaǵy qazaqstandyq IT-mamandarynyń sol jaqqa barǵanyn bárińiz biletin shyǵarsyzdar. Biz sol kezde olardy Stambýldyń birneshe iri IT-kompaniiasyna aparǵan edik. Mirýs osy is-sharanyń negizgi uiymdastyrýshysy boldy. Biz oǵan Astana Habtyń ókili bolýdy usyndyq, óitkeni eki memlekettiń habtary men mamandaryn jaqyndastyratyn adamnyń bolýy mańyzdy edi.
Stýdenttik kezden de biraz jaqsy estelikter bar, jaqyn aralasqan joldastary olardy aityp jatar dep oilaimyn. Imandy bolsyn! Janyń jánnattan oryn tapsyn, baýyrym", - dep jazdy ministr.
Tsifrlyq damý ministrligi basshysynyń kóńil aitýyna Prezident Ákimshiligi basshysynyń orynbasary, Áielder isteri jáne otbasylyq-demografiialyq saiasat jónindegi ulttyq komissiia tóraiymy Aida Balaeva da qosyldy.
"Túrkiiadaǵy alapat jer silkinisi saldarynan qapiiada qaza bolǵan jerlesterimiz - Ádil Qadyrbekov pen Mirbolat Qurmashevtyń týǵandary men jaqyndaryna qaiǵyryp kóńil aitamyn. Keshege deiin búkil el bolyp úmit otyn óshirmegen edik… Tiri tabylsa dep tilegen edik… Amal ne… Tsifrlyq tehnologiianyń qyr-syryn erkin igergen Mirýsty talaidan tanityn edim. Sońǵy ret onymen Aqparat jáne qoǵamdyq damý ministri bolyp turǵanda qyzmet barysynda kezdeskenbiz. Mirýs óte eńbekqor, izdenimpaz jas bolatyn. Qysqa ǵana ǵumyrynda talai startap-jobalardy (Digital Kazakhstan) jaryqqa shyǵardy, IT salasynda onyń esimi tanymal, úlken qurmetke ie boldy. Osyndai jigeri - jalyn, bilimi - tereń, eline bergeninen bereri mol órim jastardyń mezgilsiz ómirden ozatyny óte ókinishti.. Marqumdardyń imany salamat bolsyn! Baýyrlas túrik halqyna sabyr tileimin", - dep jazdy Balaeva Instagram-paraqshasynda.
