Túrkistan oblysynda 17 adamnyń jas qyzdy zorlaý áreketi boiynsha óńirdiń bas politseii pikir bildirdi. Qairat Dálbekovtyń aitýynsha, jábirlenýshiniń anasy kúdiktilerden 8 million teńge alǵanyn ózi habarlaǵan, dep habarlaidy QazAqparat.
«Áleýmettik jelide Saryaǵash aýdanynda 17 er adamnyń qyzdy zorlaǵany týraly aqparat shyqqany belgili. Osy aýdanǵa jeke ózim baryp, qyzdyń anasymen jáne ózimen advokat pen jýrnalistiń qatysýymen kezdestim. Tergeý barysynda sot-meditsinalyq saraptama ortalyǵynyń qyzmetkerleri zorlyq-zombylyq deregin joqqa shyǵardy. Sondai-aq anasy qyzynyń kiimin óz qolymen órtegenin moiyndady. Osyǵan bailanysty sarapshylar saraptama júrgize almady. Oǵan qosa kúdiktilerden 8 million teńge alǵanyn da anasy ózi habarlap otyr.
Sondyqtan jynystyq qol suǵylmaýshylyǵyna qatysty qylmystyq isterdi tergeý kezinde tergeý kúdiktilerdiń kinásin tek saraptama nátijelerine súiene otyryp anyqtaýǵa bolatynyn túsindirgim keledi. Iaǵni bul iste saraptama asa mańyzdy, sol arqyly zorlyq bolǵan bolmaǵany anyqtalady.
Qazir bul is Túrkistan oblystyq Politsiia departamenti Tergeý basqarmasynyń óndirisinde. Saraptama kesheni taǵaiyndaldy. Nátijeleri boiynsha zańdy protsessýaldyq sheshim qabyldanatyn bolady», - dep jazdy oblystyq Politsiia departamentiniń bastyǵy Qairat Dálbekov.
Esterińizge sala keteiik, jábirlenýshiniń anasy 25 mamyrda politsiiaǵa 17 jasar qyzynyń joǵalǵany týraly habarlasqan. Atalǵan jait boiynsha QR QK-niń 125-baby «Adamdy urlaý» boiynsha sotqa deiingi tergeýdiń biryńǵai tizilimine tirkelgen. Sodan keiin politsiia qyzdy bir kún boiy izdep, ata-anasyna qaitarǵan. Bir aptadan keiin, iaǵni 31 mamyrda áiel taǵy da politsiiaǵa kúdikti adamdarǵa qatysty urlaý jaity boiynsha qylmystyq qýdalaýdy toqtatý týraly notarialdy kýálandyrylǵan ótinishpen júgingen.
Al, 10 maýsymda aýyl turǵyny qaitadan politsiiaǵa júgingen. Bul joly qyzy joǵalǵan kezde ony 17 er adam zorlaǵan bolyp shyqqan.
Qylmystyń aýyrlyǵy eskerile otyryp, bul habarlama birden QR QK 120-baby 3-bóligi boiynsha politsiiada tirkeldi. Saraptamalar taǵaiyndalǵan.
