Foto: Shutterstock
Májilis depýtattary "Qazaqstannyń keibir zańnamalyq aktilerine bilim berý jáne tálimgerlik máseleleri boiynsha ózgerister men tolyqtyrýlar engizý týraly" zań jobasyn talqylap jatyr, - dep habarlaidy Massaget.kz.
Jalpy otyrysta depýtat Ashat Aimaǵambetov zań jobasyn tanystyrdy. Ondaǵy normanyń biri – oqýshylarǵa sabaq ústinde telefon ustaýdy shekteý.
"Ustazdarmen bolǵan kezdeýlerde taǵy bir másele talqylandy. Ol – oqýshylardyń sabaq ústinde telefon paidalanýy jáne ony tyiý boiynsha zańnamada naqty shekteýlerdiń bolmaýy. Sondyqtan sabaq kezinde uialy telefondardy paidalanýdy shekteý týraly arnaiy norma da jobaǵa engizildi", - dedi ol.
Zań jobasyn qabyldaý bilim berý salasyndaǵy jáne jetim balalardyń quqyǵyn qorǵaý salasyndaǵy zańdy jetildirýdi kózdeidi.
Jiynda depýtat Ardaq Nazarov mektepte oqýshylarǵa telefon qoldanýdy múldem tyiym salý kerektigin aitty. Alaida Ashat Aimaǵambetov bul máselege qatysty pikir bildirdi.
"Bizdiń usynyp otyrǵan zańdaǵy norma – uialy telefondy tek sabaq kezinde shekteýge qatysty. Mektepke telefondy alyp kelip, úziliste ony qoldanýǵa shekteý joq. Oqýshylar úziliste uialy telefondy qoldanam dese qoldanady. Tek sabaq ústinde qoldanbaýy kerek.
Sabaqta bala tek sabaq oqýy kerek. Tik-Tok pen Instagram-da otyryp basqa dúnielermen ainalysýǵa naqty shekteý qoiylyp otyr. Shekteýdiń ishine eger muǵalim sabaq jospary boiynsha "telefondy ruqsat etse" degen normany engizdik. Nege? Sebebi, qazir zamanaýi muǵalimder bar. Olar sabaqta innovatsiialyq tehnologiiany qoldaný úshin smartfondy qoldanǵylary kelse, onda shekteý joq. Al jalpy mektepte shekteý máselesi áli qarastyrylǵan joq. Ol qosymsha uiashyqtardy, materialdardy qajet etedi. Sondyqtan biz telefondy múldem tyiym salý máselesin qarastyryp otyrǵan joqpyz", - dedi depýtat.
