Almaty qalasyndaǵy himiia-biologiia baǵytyndaǵy Nazarbaev Ziiatkerlik mektebinde "Zamandastar jyrlaidy" jáne "Danalyq beisenbi" jobalary aiasynda oqýshylardy qazirgi aqyn-jazýshylardyń shyǵarmalarymen tanystyrý, sóz ónerine baýlý, kórkem ádebietke degen qyzyǵýshylyqtaryn arttyrý maqsatynda uiymdastyrýymen belgili qalamgerler, QR Jazýshylar Odaǵynyń músheleri, aqyn, "Baldyrǵan" jýrnalynyń bas redaktory Erǵali Baqash jáne jazýshy, jýrnalist Maqsat Málikpen kezdesý ótkizildi, dep habarlaidy Ult.kz.
Kezdesý shymyldyǵyn Ziiatkerlik mektebiniń «Nur -sazy» halyq aspaptar orkestriniń dobyrashylary "Erke sylqym" kúiimen ashty.
Oqýshylar kezdesý qonaqtarynyń shyǵarmashylyǵyna arnalǵan tanystyrý beinebaian jasap, óleńderin oqydy, áńgimeleri boiynsha pikirlerimen bólisti. Aldyn ala qalamgerlerdiń shyǵarmalaryn oqyǵan oqýshylar óz oilaryn ashyq aityp, kózqarastaryn jetkize bildi:
"Búgin biz oqýshylarmen kezdestik, áńgime qurdyq, óte keremet. Oqýshylardyń oi-óristeri keń ekenin ańǵardyq, oilaý ereksheligi de muldem basqa, erkin jetkizedi. Himiia-biologiia baǵytyndaǵy mektepte oqyp bir salaly bolyp qalmai, ǵylym men ádebietti qosa alyp júrgenderi, qazaq ádebietinen habarlary bar ekendigi qýanarlyq jaǵdai",- dep bólisti Maqsat Málik.
Kezdesý qonaqtary oqýshylarǵa maǵynaly da mándi áńgime aita otyryp, oqýshylarǵa shyǵarmashylyqpen ainalysýǵa, kórgen-túigenin jazýǵa yntalandyrdy. Kezdesý sońynda qalamgerler mektep kitaphanasyna, oqýshylarǵa "Baldyrǵan", "Ulan", "Aq jelken" basylymdaryn jáne óz týyndylar jinaǵyn tartý etti.
"Búgingi kezdesýge qatysqan oqýshylardyń, jas talapkerlerdiń ózderin ustaýy, sóileý mádenieti, bilim deńgeileri joǵary eken degen baǵa berýimizge bolady. Qazirgi zamanda balalardyń oiyn jetkizý degen úlken problema",- dep Erǵali Baqash ziiatkerlerdi «Baldyrǵan» jýrnalynyń avtorlar qataryna shaqyrdy.
"Ziiatkerlik mektepte qazaqtyń kórnekti ókilderi – qazirgi zamannyń aqyn-jazýshylarmen kezdesý uiymdastyrý durys jolǵa qoiylǵan. Ár kezdesý oqýshylarǵa oi túidirip, qazaq ádebietine qyzyǵýshylyqty týdyrady. Búgingi kezdesý rýhani álemge saiahat bolyp, ziiatkerlerdiń jan-dúniesin baiytýǵa úlken septigin tigizdi dep oilaimyn",- dedi úiymdastyrýshy, pedagog-kýrator Janargúl Islamqyzy.
