Elimizde mektep oqýshylarynyń bilim alýyna teń múmkindik jasaý úshin qandai jumys atqarylyp jatyr? Depýtattardyń osy saýalyna Úkimet basshysy Asqar Mamin jaýap berdi, dep habarlaidy "Ult aqparat".
«Qashyqtan oqytýǵa ońtaily jaǵdai jasaý maqsatynda normativti qujattarǵa tiisti ózgerister engizilip, óńirlerdiń bárine shekteý sharalary kezinde oqý protsesin uiymdastyrý boiynsha ádistemelik keńester legi joldandy. Qazirgi ýaqytta 679 myń oqýshyǵa (kompiýter men internetke qoljetimdiligi joq 730,3 myń oqýshynyń ishindegi) kompiýterlik tehnika berildi. 7013 mektep (97,6%) jyldamdyǵy 4 Mbit/s jáne odan da joǵary internetke qosyldy. Kompiýtermen qamtamasyz etý jumysynda áleýmettik turǵyda az qamtylǵan otbasylardyń balalaryna basymdyq berilip otyr. Sonymen qatar osy sanattaǵy 300 myń bala qordyń esebinen 6,3 mlrd teńgege kiimmen, mektep qajettigimen qamtamasyz etildi», - dep jaýap berdi Asqar Mamin depýtattardyń saýalyna.
Premer-ministr qashyqtan oqytýdy uiymdastyrý úshin 8 qazaqstandyq internet-platfoma tańdap alynǵanyn habarlaidy.
Atalmysh internet alańdar oqý protsesiniń qatysýshylaryna oi almasýǵa, oqýshy men muǵalimniń arasynda keri bailanys ornatýǵa, onlain sabaqtardy, videosabaq ótkizip, sabaqty jazyp alýǵa múmkindik beredi.
«Pedagogtardyń avtorlyq tsifrlyq bilim resýrstaryn paidalaný úshin (1 myńǵa tarta) Bilim jáne ǵylym ministrligi Online.edu.kz platformasy men «Órleý» bilim arnasyn ázirledi. Uialy bailanys operatorlarymen birge oqýshylar men muǵalimderge arnalǵan arnaiy «Bilim» tarifi iske qosyldy. Qosymsha oqý resýrsy retinde saǵat 09.00-den keshki 18.00-ge deiin «Balapan» jáne «El Arna» respýblikalyq arnalarynda televiziialyq sabaqtar júrgiziledi», - deidi Úkimet basshysy.
Sonymen qatar Asqar Mamin qashyqtan oqytý kezinde kemshilikterge jol bermeý úshin Bilim jáne ǵylym ministrligi aimaq basshylarymen birge oqýshylardyń oqý baǵdarlamasynan qalyp qalý deńgeiin anyqtaý jáne ony teńestirý, monitoring, zertteý, saýalnama arqyly problemalyq suraqtardy zertteý (12 myń oqýshy men 4 myń muǵalimnen, 12 myń ata-anadan saýalnama alynǵan), oqýdan qalyp bara jatqan oqýshylarǵa differentsialdy keńes berý boiynsha jumys bastalǵanyn jetkizdi.
«Júrgizilgen sharalardyń nátijesi boiynsha ata-analar men oqýshylardyń talap-tilegimen kanikýl ýaqytynda (qarasha men qańtar ailary) qajetti keńes pen jeke sabaqtar ótkiziledi», - dedi Asqar Mamin.
