Oqý jylynyń alǵashqy eki aptasynda qazaqstandyq oqýshylardyń shamamen 1 paiyzy koronavirýs juqtyrdy. Bul týraly QazAqparat BǴM silteme jasap habarlaidy.
Qazaqstandyq oqýshylardyń jalpy sanynyń 0,07%-y oqý jylynyń alǵashqy eki aptasynda koronavirýs juqtyrdy.
«1 qyrkúiekte mektepterde oqý dástúrli formatta bastaldy. Balalardyń densaýlyǵyn qorǵaý maqsatynda bilim berý uiymdarynda qajetti sanitarlyq sharalar qabyldandy. Sabaq kestesi, úzilister men býfetke barý ýaqyttary dálizde balalardyń kóp jinalmaýy úshin rettelgen. Sonymen qatar, balalardyń bir kabinetten ekinshisine aýysýy shekteldi. Iaǵni oqý protsesi «bir synyp – bir kabinet» qaǵidaty boiynsha uiymdastyrylyp, aýysym sany artty. Bir oqýshy aýyryp qalatyn bolsa, barlyq synyp karantinge jiberiledi. Osy eki apta ishinde qazaqstandyq oqýshylardyń jalpy sanynyń 0,07%-y koronavirýs juqtyrǵan. Qyrkúiek aiynyń basynda karantinge jiberilgen synyptar osy aptadan bastap dástúrli oqýǵa qaita oraldy», – dedi QR BǴM Mektepke deiingi jáne orta bilim komitetiniń tóraǵasy Gúlmira Kárimova.
Sondai-aq, vaktsinatsiianyń arqasynda pedagogter arasynda koronavirýsty juqtyrý sany azaidy. Jańa oqý jyly bastalǵaly elimizdegi muǵalimderdiń jalpy sanynyń 0,09%-y aýyrǵan.
Álemniń kóptegen memleketterinde siiaqty jańa oqý jyly elimizde dástúrli formatta ótip jatyr.
Sondai-aq, Almaty qalasyndaǵy epidemiologiialyq jaǵdaiǵa bailanysty jańa oqý jylynyń aldynda ata-analarǵa oqytý formatyn tańdaý múmkindigi berilgenin eske salamyz.
Sol kezde onlain-formatty óte az bóligi – almatylyq oqýshylardyń jalpy sanynyń 5,6%-y ǵana tańdaǵan bolatyn. Búgingi tańda eki myńnan astam bala onlain-formattan dástúrli oqýǵa oraldy. Epidemiologiialyq jaǵdaidyń qalypqa kelýine bailanysty ata-analar qashyqtan oqytýdan bas tartyp, balalaryn mektepterge jiberip jatyr.
«Meniń nemerem biyl birinshi synypqa bardy. Basynda biz de ýaiymdap, onlain-oqytýdy tańdadyq. Biraq ol úide otyrǵysy kelmeidi, synyptastarymen birge otyryp oqyǵysy keledi. Báribir bala kóshege shyǵyp oinaidy, dúkenge, qonaqqa jáne úiirmelerge barady. Sondyqtan biz dástúrli oqytý formatyn tańdaýdy uiǵardyq. Úide otyrǵan balanyń bar yntasyn sabaqqa bólýi ekitalai. Ár nársege alańdap, oqytý baǵdarlamasyn tolyq meńgere almaidy. Pandemiia qashan aiaqtalatyny belgisiz. Sondyqtan pandemiianyń aiaqtalýyn kútip, bilim sapasyn túsirip almaý mańyzdy», – dep atap ótti Almaty qalasynyń turǵyny Gúlbahar Ýálieva.
