Balalar jylyna arnalǵan josparǵa formaldy is-sharalardy qosýdyń qajeti joq. Bul týraly QR Oqý-aǵartý ministri Ashat Aimaǵambetov aitty, dep habarlaidy QazAqparat.
«Balalar jyly boiynsha jospar bekitildi. Biraq qazir áriptesterimiz daiyndalmai sóz bergen edim. Árine, negizinen biraz jumys júrgizilip jatyr. Biraq júieli túrde júrgizilgenin kórmedim. Álde daiyndalǵan joqsyzdar ma? Bilmeimin qalai ekenin. Desek te, Balalar jyly boiynsha óńirlerdiń josparlaryn qaita qaraý kerek. Olardy tolyqtyrý kerek. Ár aýdannyń álde qalanyń bilim bólimi boiynsha osyndai jospar bolýy kerek. Sizderge sóz bergende ol daiyn turyp, kádimgidei júieli máselelerdi aityp berýlerińiz qajet. Qazir kózim jetip otyr, jalpy júieli máseleler men kúndelikti bolyp jatqan máselelerdi aiyra almai otyrsyzdar. «Osynshama mektep jóndep jatyrmyz» deisizder. Ol aldyńǵy jyly da jóndeldi, jóndelýi kerek te», - dedi Ashat Aimaǵambetov vedomstvonnyń apparat jinalysynda.
Osy rette ministr óńirlerdiń bilim bólimi basshylaryna Balalar jylynda naqty júieli qandai is-sharalar oryndalady, josparǵa ne kirdi degen suraqtarǵa jaýap berýge daiyn bolý kerektigin eskertti.
«Sondyqtan jospardaǵy 200 is-sharany qaitadan qarańyzdar. Sizderge 2 apta ýaqyt beremin. Kúndelikti, balalar jyly bolmasa da ótkiziletin is-sharalardy qosýdyń qajeti joq. Balalarǵa bailanysty qandai problemalar bar bolsa, sony ishine qosý kerek. Múmkin az bolar. Biraq, bizge formaldy túrdegi is-sharalardy qosýdyń qajeti joq», - dedi ol.
